Georganiseerde landbou kán 'n invloed hê op die nadelige gebeure in die land wat almal se lewens raak, mits die bul by die horings gepak word. “Ons moet op grondvlak begin woeker,” sê mnr. Pierre Vercueil, herkose voorsitter van Agri Noordwes.
Vercueil het by die organisasie se jaarkongres in Lichtenburg gesê die proses sal met risiko’s gepaard gaan en eenheid en groter deelname sal nodig wees. Die afgelope jaar is volgens hom deur verskeie probleme gekenmerk, soos konflik, swak dienslewering, verdelende politieke retoriek, korrupsie, werkloosheid en plaasmoorde.
LEES OOK: Volgende stap met onteieningswet beplan
Gevaarlike uitsprake
Politieke retoriek is besig om hande uit te ruk, soos uitsprake dat boere grond gesteel het.
“Dit is onaanvaarbaar. Indien ons die grond sou gesteel het, kan ons sekerlik voor die hof gedaag word om dit te hanteer.”
Vercueil het na woorde van die Amerikaner Benjamin Franklin verwys, dat geregtigheid net sal geskied wanneer diegene wat onaangeraak is, so kwaad is soos diegene wat geraak is.
“Is ons al by die punt waar ons verontwaardiging so groot is dat ons bereid is om gesamentlike oplossings vir die landbou deur alle landbouers te beding? Of wil ons dit oorlaat aan politici en mense wat geen kennis van boerdery het nie?”
Hy het verwys na die Regering se onvermoë om sy eie teikens vir grondhervorming te behaal, en dat die meeste van die grond wat herverdeel is, nie meer produktief is nie.
“Selfs politici moet saamstem dat grondhervorming wat só gedoen word, nie volhoubaar is nie. Dit kan nie as bemagtiging gedefinieer word nie en maak sekerlik nie ekonomiese sin nie.”
LEES OOK: Wie besit Suid-Afrika se grond?
Ingryping is nodig
Vercueil sê daar is geen begrip van die vaardighede wat 'n suksesvolle kommersiële boer nodig het nie, soos om biologiese beginsels met ekonomiese beginsels te versoen.
“Die enigste mense wat sinvolle grondhervorming kan laat gebeur, is kommersiële boere self. En dit is eintlik nie boere se werk nie.” Maar boere is nou op 'n punt waar hulle, in hul eie belang, om private eiendomsregte en alles wat daarmee gepaard gaan te behou, moet ingryp om dit te laat werk.
Boere kan veral deur mentorskap 'n rol speel.
“Daar is nie 'n ander manier om nuwe boere suksesvol te vestig nie. Die finansiering hiervoor is nou beskikbaar, as dit met 'n goeie sakeplan en uitbreiding van bestaande sake gepaard gaan.”
Vercueil het gesê bemagtiging moet soos 'n sakebegrip benader word. Begunstigdes moet bereid en gereed wees om te boer, en hulle moet titelaktes hê.
