Die trekker- en stroperreus New Holland het geen planne om sy bedrywighede in Suid-Afrika te staak nie.
In ’n eksklusiewe onderhoud met Landbouweekblad op die Nampo-Oesdag het mnr. Frederico Bellotto, CNH Industrial se bedryfsdirekteur: Suidelike Afrika, gesê die maatskappy het géén belang daarin om New Holland uit die plaaslike landbou te onttrek nie.
“Die CNH Industrial-groep het, as eienaar van New Holland, besluit om direk betrokke te raak by die maatskappy se bedrywighede in Suid-Afrika.”
New Holland Suid-Afrika het voorheen besigheid gedoen onder die Humulani/Invicta-groep, onder kontrak met CNH Industrial. Hierdie kontrak is in Januarie 2017 deur CNH Industrial gekanselleer.
Wye verskeidenheid produkte
“Ons het gesien New Holland bied ’n uiters wye verskeidenheid produkte, maar dat die maatskappy se markaandeel wat trekker- en stroperverkope betref in Suid-Afrika laag was. Markaandeel in trekkerverkope was sowat 17% en minder as 9% by stroperverkope. In teenstelling hiermee is ons markaandeel in sommige Afrikalande bykans 50%, terwyl ons een van die voorste trekker- en stroperverkopers in Europa en die Midde-Ooste is,” het Bellotto gesê.
“Ons het dus besluit om self beheer van New Holland Suid-Afrika te neem, omdat ons glo dat ’n onafhanklike besigheid beter resultate sal bring,” het hy gesê.
Die kontrak tussen CNH Industrial en Invicta Holdings is in Januarie beeïndig. “Nadat ons die kontrak met ’n kennistydperk beeïndig het, het CNH Industrial begin om ons struktuur vir New Holland te vestig. Dit sluit die aanstel van sleutelpersoneel in verkope en naverkopediens in. Ons het ook ’n onderdelepakhuis in Centurion opgerig en tegnikuste aangestel of behou, na gelang van die behoefte.
Handelaars besoek
“Ons het boonop ons netwerk van handelaars gaan besoek en 90% van hulle het besluit om aan te bly as New Holland-handelaars. Hierdie handelaars sluit ’n aantal private besighede, insluitende Laeveld Trekkers en vier koöperasies, NWK, SSK, Kaap Agri,en TWK, in,” het Bellotto gesê.
Hy het gesê CNH Industrial sal van dieselfde onafhanklike netwerk van handelaars gebruik maak, soortgelyk aan Humulani/Invicta Holdings se model. “Dit het ons wye dekking regoor die land gegee en in gebiede waar leemtes was is ons tans in gesprekke met handelaars in die omgewing om ook die gapings te vul,” het Bellotto gesê.
Bellotto sê CNH Industrial het reeds sowat €3 miljoen in New Holland belê. “Dit sluit beleggings in personeel, nuwe rekenaarstelsels en dienste in. Ons sou nie hierdie tipe bedrag belê het indien ons nie in die langtermyn sukses van die maatskappy geglo het nie.” Hy het benadruk dat CNH International vanaf 1 Junie 2017 die alleen-verspreider van New Holland-produkte in Suid-Afrika sal wees.
Binne drie jaar 30% van die mark
“Ons verwag om op die korttermyn na ’n 20% markaandeel te groei en dit verder uit te brei na 25% markaandeel binne die volgende drie jaar. Ons verwag die eerste nuwe trekker-eenhede reeds teen die einde van die maand,” het Bellotto gesê.
Hy het verdere goeie nuus vir New Holland-kliënte gehad en gesê dat die wisselvallige rand nie New Holland se trekkerpryse sal beïnvloed nie. “Ons wil stabiliteit in ons trekkerpryse bring. Ons besigheidsmodel om dit reg te kry is anders as wat die geval in die verlede was, maar ek glo ons gaan dit regkry.”
Hy het gesê hoewel CNH Industrial vir eers net op New Holland se werksaamhede in Suid-Afrika gefokus is, die volgende stap uitbreidings na die res van suidelike Afrika sal wees. “Ons groot fokus vir nou is egter om ons markaandeel in Suid-Afrika te groei en van New Holland ’n groter rolspeler in die trekker en stropermark te maak,” het hy gesê.
