Mpumalanga Landbou het die aanval op mnr. Gustav Rappard en sy vrou, Elma, in die sterkste moontlike terme veroordeel en vra die polisie om alles moontlik te doen om die skuldiges aan te keer.
Brig Selvy Mohlala, woordvoerder van die polisie, sê daar was nog geen deurbraak nie maar die ondersoek gaan in alle erns voort. Kort na die voorval het lt genl Semakaleng Daphney Manamela, die provinsiale kommissaris, gesê alles moontlik moet gedoen word om die verdagtes so spoedig moontlik aan te keer sodat hulle vir hulle dade kan tereg staan.
“Dit is regtig n skande dat weerlose slagoffers geteiken word en nadat hulle beroof is, hulle koelbloedig vermoor word.”
‘Wil hooi koop’
Volgens die polisie se verklaring het Rappard en sy vrou omstreeks 11:00 gister (20 Maart) ’n toeter by hulle moterhek gehoor. Rappard het ondersoek gaan instel en volgens sy vrou was daar ses mans wat aangedui het dat hulle bale hooi wou koop. Hy het aanvanklik vir hulle gesê dit is Sondag en hy kan hulle nie help nie en teruggekeer huistoe.
Hy het egter kort daarna besluit om hulle wel te help waarna hulle hom vermoedelik oorval en verwurg het. Vier gewapende verdagtes het daarna die huis binne gegaan en geld van sy vrou geëis. Sy is vasgebind nadat sy gesê het daar is geen geld in die huis nie en hulle het die huis deursoek. Die verdagtes is weg met twee selfone.
Elma, wat in daardie stadium onbewus was van wat met haar man gebeur het, het haar losgewikkel en na die bure se plaas geloop om hulp te soek. Ná n soektog op die plaaswerf is Rappard se liggaam in ’n skuur gevind. Die polisie en paramedici is ontbied maar hy is op die toneel dood verklaar. ’n Saak van moord is geopen en die polisie het ’n soektog na die verdagtes van stapel gestuur.
Landelike veiligheidsplan
Mnr. Robert Davel, uitvoerende hoof van Mpumalanga Landbou, het namens die organisasie sy innige meegevoel met die naasbestaandes van die oorledene betuig.
“Mpumalanga Landbou doen ’n dringende beroep op die premier en die LUR vir gemeenskapsveiligheid van Mpumalanga om hierdie jongste moord op ’n onskuldige boer ten sterkste in die openbaar te veroordeel. Ons doen ook weereens ‘n dringende beroep op die owerheid om die misdaadsituasie in landelike gebiede onder beheer te bring.”
Hy sê doelgerigte implementering van die nasionale landelike veiligheidstrategie, deur die polisie in Mpumalanga, kan nie langer uitgestel word nie.
“Owerhede word versoek om wet en orde konsekwent, sonder vrees of guns, toe te pas. Mpumalanga Landbou ondersteun alle regmatige pogings met die doel om ons produsente, ons plaaswerkers en hulle gesinne se veiligheid te verbeter.”
Kommunikasie
Davel sê hulle sal steeds op provinsiale vlak alles in die stryd werp vir die verbetering en instandhouding van doeltreffende kommunikasie met die polisie. Affiliasies van Mpumalanga Landbou word aangemoedig om by plaaslike polisiestrukture, soos voorgeskryf deur die landelike veiligheidstrategie, in te skakel.
“Plaaslike strukture word ook aangemoedig om opnuut ernstig aandag te gee aan die paraatheidsvlakke van ons landbougemeenskappe wat gebuk gaan onder voortdurende aanvalle deur brutale misdadigers. Boereverenigings word versoek om spesiale opskerpingsgeleenthede, ten opsigte van weerbaarheid, in streeksverband aan te bied. Mpumalanga Landbou kan gekontak word vir ondersteuning in die verband.”
