Die uitvoervolumes van Suid-Afrikaanse wyn het in die eerste drie maande van die jaar goeie groei getoon, aldus Wines of South Africa (WOSA).
Luidens ‘n verklaring was uitvoervolumes in die eerste kwartaal van die jaar 21% hoër in vergelyking met die syfers van dieselfde tydperk in 2011.
Me. Sue Birch, uitvoerende hoof, sê uitvoer is hoofsaaklik deur grootmaat-verkope gedryf. Sy sê gebottelde wyn in nie-tradisionele markte soos, Oos-Afrika, Rusland en Japan, het wel ook goeie groeisyfers aangeteken.
Nigerië toon goeie potensiaal
Intussen het wynuitvoere na Nigerië in die twaalf maande tot Maart die jaar met 12% toegeneem. Die organisasie ondersoek tans die moontlikheid om die potensiaal van dié mark te ontgin.
Die land se wynmark se waarde word tans op sowat $300 miljoen bereken, en dit sal na verwagting teen 2015 tot sowat $370 miljoen toeneem. Nigerië voer tans sowat 60% van al sy wyn uit Europa in, en Suid-Afrika is die naasgrootste verskaffer met ‘n volume-aandeel van 22%.
Tydens ‘n seminaar wat WOSA die week in Stellenbosch aangebied het, het mnr. Sapta Bhattacharyya, woordvoerder vir die navorsingsmaatskappy Aranca, gesê die volume wyn wat van 2007 tot 2011 na Nigerië uitgevoer is, het met ‘n saamgestelde groeikoers van 24,1% toegeneem.
Mark vir ultra luukse goedere
Bhattacharyya sê rooi wyn maak die grootste deel van die mark uit en verteenwoordig 73,6% van alle wyn wat verkoop word. Hy meen die land se mark vir ultra luukse goedere word deur sowat ? miljoen verbruikers verteenwoordig.
Volgens Birch moet groei aan die bo-punt van die mark nie geïgnoreer word nie. “Baie van die wêreld se luukse-handelmerke is nou in Nigerië beskikbaar, waar onder van die mees gesogte spiritualieë en sjampanjes wat gou by die land se welvarende verbruikers ? gevolg opgebou het. Ons hoor van verskeie Suid Afrikaanse produsente dat daar ? lewendige belangstelling vir premium- en hoërprys-wyne bestaan.”
WOSA is van plan om meer te konsentreer op die oorwegend Christelike suidelike deel van dié land.
20 April 2012
