Die hand van vriendskap en samewerking met grondhervorming wat mnr. Gugile Nkwinti, Minister van Landelike Ontwikkeling en Grondhervorming, by Agri SA se kongres uitgesteek het, is die “geleentheid van ’n leeftyd” sê mnr. Ernst Janovsky, hoof van Absa AgriBesigheid.
Hy het by die kongresdinee gesê almal wou ’n oorlog voer. “Maar ’n wit vlag is gehys wat sê kom ons werk saam en hierdie samewerking moet vir ons die pad vorentoe baan. Ek wil elkeen uitdaag om dit môre op jul plase te begin toepas.”
Hy het verwys na Nkwinti se opmerkings dat hy in sy skik is met die vordering wat Agri SA met hervormingsplanne maak. Hy het gesê hy is verleë dat hy nie daarvan bewus was nie en oorgestel die onderskeie taakspanne moet onderling saamwerk.
Janovsky sê banke kan die platform skep sodat ’n boer sy besigheid kan vergroot en saam met grondhervorming meer winsgewend kan wees. “Hierdie moet nie ’n meulsteun om jou nek wees nie. Hierdie is die geleentheid waarvoor almal gewag het. As jy kyk na hoeveel kos in die volgende 40 of 50 jaar geproduseer moet word, is hierdie die grootste enkele geleentheid wat nog binne Suid-Afrikaanse landbou bestaan het.
"Die Minister het gesê die planne het verander en júlle planne lyk beter as myne. Dit is ’n groot verandering. Moet nie daardie geleentheid laat verbygaan nie, al gaan dit nie maanskyn en rose wees nie. Daar is staatsdepartemente wat nog nie ingekoop het by dit wat gebeur het nie. Van die banke se kant af sal ons julle help bemagtig om die pad vorentoe te stap.”
Janovsky sê hier is nou ’n nuwe pad vorentoe. “Hierdie is die geleentheid van ’n leeftyd. Moet nie dat dit by julle verbygaan of toelaat dat klein jakkalsies die skape opvreet nie. Dit is ’n geleentheid om aan te gryp.”
