In ’n reuse-terugslag vir die volstruisbedryf is 650 volstruise in die Oos-Kaap met die H5N2-virus gediagnoseer.
Luidens ‘n berig in Volksblad is 400 van mnr. Kent Krige, die eienaar van Teasdale naby Klipplaat, se volstruise en hul kuikens Dinsdag (1 November 2011) in die slagplaas op Oudtshoorn van kant gemaak.
Die laaste 250 voëls word vandag (2 November 2011) van kant gemaak. “Ek het gelukkig nog skape en bokke oor. My volstruisboerdery is egter heeltemal tot niet. Ek sal van voor af moet begin. Dit was ’n groot skok om te hoor ek is my volstruise kwyt,” aldus Krige.
Krige se grootste vrees is dat hy van sy werkers sal moet afdank. Van die werkers se kontrakte verstryk binnekort, en hy is nie seker of hy dit sal kan hernu nie.
Twee weke
Dr. Malcolm Macfarlane, staatsveearts vir die Willowmore- en Baviaans-omgewing, sê die besluit om Krige se voëls almal van kant te maak, is op nasionale vlak geneem.
Hulle het reeds twee weke gelede vermoed dat dié virus onder Krige se voëls voorkom, maar hulle kon nie optree voordat hulle nie finale toetsuitslae gehad het nie.
Macfarlane sê die nasionale uitvoer van volstruisvleis sal gestaak word tot volledige toetse bevestig dat die virus nie versprei het nie. Die uitvoer van volstruisprodukte sal in Januarie hersien word. “Gelukkig is die virus net op een spesifieke plaas gevind,” het hy gister gesê.
Die Klein-Karoo het sedert April vanjaar reeds sowat 33 000 volstruise weens die virus verloor, en groot hoop het bestaan dat vleisuitvoer buite die Klein-Karoo teen Oktober of November vanjaar hervat sou kon word.
Bron: Volksblad
2 November 2011
