Noordwes is tans in die proses om vir ramphulp aansoek te doen nadat brande ook in dié provinsie groot skade aangerig het, sê Agri NW.
Mnr. Boeta du Toit, hoofbestuurder, sê sowat 100 000 ha het reeds in die slag gebly. “Die afgelope naweek het sowat 24 000 ha op ‘n plaas in die Molopo-gebied afgebrand, terwyl sowat 40 000 ha in die Skuinsdrif-omgewing in die Groot Marico-distrik in die slag gebly het,” vertel hy.
‘n Opname word gedoen om te bepaal hoeveel skade die brande aangerig het, aangesien brande sedert die naweek van Delareyville af tot by Schweizer-Reneke en Deneysville voorkom. Volgens Du Toit het geweldige brande ook in die Ottosdal-omgewing skade aangerig.
Weerlig
Volgens Du Toit word baie van die brande deur weerlig veroorsaak. Daar word vermoed dat brandstigting ook in verskeie dele voorgekom het, veral in die Ventersdorp-omgewing.
Baie van die brande woed steeds voort, en Du Toit sê hy hoop dit sal binnekort onder beheer gebring kan word. Sowat 30 000 ha het tydens ‘n brand vroeër vanjaar in die Vryburg-omgewing in die slag gebly.
Noord-Kaap brand ook
Intussen sê brandbeheerbeamptes van Agri Noord-Kaap dele van dié provinsie het ook die afgelope paar dae onder veldbrande deurgeloop. Mnr. Kobus Gouws van die Ghaabse Berg-distrik sê ‘n brand het by Barkly-Wes voorgekom, maar dit is gelukkig geblus.
Die omgewing het tydens ‘n vroeëre brand reeds 20 000 ha verloor. Gouws sê geen lewensverlies is aangeteken tydens dié brande nie, maar vyf beeste, twee perde, en 25 bokke en skape het in die slag gebly, asook verskeie voertuie.
Mnr. Jeremy Bezuidenhout van Kuruman sê ‘n groot brand het verlede week ernstige skade in die Boshof-omgewing aangerig. Die brand het na verwagting duisende hektare verwoes nadat dit vir sowat vyf dae gewoed het voordat dit geblus kon word. Drie ander brande het ook oor die naweek voorgekom, maar dié kon vinnig onder beheer gebring word.
12 Oktober 2010
