Daar hang weer onweerswolke oor Mpumalanga se foreldriehoek nadat die provinsiale departement van omgewing sonder waarskuwing of konsultasie besluit het om weg te doen met jaarpermitte vir die vrylaat van forelle in private damme, en ’n maandelikse permitstelsel in te stel.
Die Mpumalanga- Parke-en-Toerisme-agentskap (MPTA) het in Maart summier aangekondig dat jaarlikse permitte vir die vrylaat van forel deur maandpermitte vervang sou word, en waarsku eienaars van vlieghengelbestemmings in dieselfde asem dat dit twee tot drie weke kan duur om aansoeke te verwerk. Boonop mag daar nie vooruit aansoek gedoen word om permitte nie.
Mnr. Peter Arderne, sekretaris van die forelhengelfederasie (Fosaf), verduidelik skriftelik aan sy lede dat baie vlieghengeloorde forel regdeur die jaar vrylaat vir hul gaste om te vang. Dit is selfs meer as een keer per maand in spitstye rondom skoolvakansies en langnaweke. “Hierdie stap deur die MPTA sal byna elke bestemming in die foreldriehoek van Mpumalanga dwing om sy deure te sluit,” sê hy.
Van die hengeloorde wat gelukkig genoeg was om hul 2022-permitte voor die afsnydatum van 1 Maart te kry, mag aanhou om vis in hul water vry te laat tot einde vanjaar. Baie ander is egter volgens Arderne nou hoog en droog gelaat en kan nie vir hul kliënte goeie hengelgeleenthede bied nie, want hulle mag nie forel in hul water aanvul of vrylaat sonder wettige permitte nie.
Dit tref forelboere wat lewende vis aan hengeloorde lewer, waarskynlik die swaarste. Mnr. Stephan van der Merwe, voorsitter van die noordelike forelvereniging, kon sy oë nie glo toe hy die kennisgewing sien nie. Hy het gedink dit was ’n misverstand aan die kant van ’n amptenaar by die MPTA se kantoor in Mbombela.
Wat hom betref is die wysiging nie net onprakties nie, maar daar is ook fout met die proses. Daar was geen openbare deelnameproses vooraf soos vereis deur die Wet op die Bevordering van Administratiewe Geregtigheid (Wet 3 van 2000) nie. Die MPTA het nie op sy oproepe en e-posse gereageer nie.
Daarom het Van der Merwe nou die hulp van ’n prokureur, mnr. Richard Spoor, ingeroep wat vrae skriftelik aan die MPTA se waarnemende hoof, mnr. Mduduzi Vilakazi, gerig het. Ná ’n lang wagtydperk van geen kommunikasie nie het Vilakazi laat weet dat die MPTA se regsverteenwoordiger met Spoor kontak sou maak.
Mnr. Ilan Lax, voorsitter van Fosaf, sê daar is intussen ’n vergadering belê tussen Vilakazi se kantoor en belanghebbendes van die Mpumalanga-forelbedryf. “Ons hoop dat redelikheid sal seëvier en dat die saak spoedig reggestel kan word.”
