Mnr. Robert Davel, uitvoerende hoof van Mpumalanga Landbou, sê die organisasie is stomgeslaan deur mnr. Thulas Nxesi, minister van arbeid en indiensneming, se besluit om die nasionale minimum loon vanaf 1 Maart met 9,6% te verhoog.
“Hierdie verhoging wek die indruk dat die nasionale minimumloonkommissie slegs insette vanuit die arbeidsektor in ag geneem het in sy advies aan die minister.
“Tot dusver was die landbousektor een van die belangrike bydraers tot werkskepping in die provinsie. Die afkondiging van die hersiene minimum loon toon geen balans tussen arbeid en werkskepping nie. Met hierdie absurde verhoging maak die minister dit feitlik onmoontlik om ongeskoolde werkers in diens te neem.
“Die boodskap is hard en duidelik dat werkskepping beslis nie ’n prioriteit is vir die regerende party nie. ’n Verhoging beduidend bo inflasie in reeds moeilike ekonomiese omstandighede, wat die sektor tans trotseer, maak die kans vir nuwe werksgeleenthede nul. Inteendeel, grootskaalse afleggings is ’n sterk moontlikheid.”
Davel meen die “onrealistiese verhoging” van die minimum loon is niks minder nie as ’n klap in die gesig van Suid-Afrika se miljoene werklose mense.
“Die impak van talle ekonomiese kwessie op die landbousektor is klaarblyklik nie in ag geneem met hierdie besluit nie. Volhoubare landbouproduksie in ons provinsie is reeds op risiko as gevolg van die reuse- ongunstige impak van voortdurend hoë vlakke van beurtkrag, hoë vlakke van misdaad, hoë rentekoerse, skerp stygings in insetkoste en onlangse vloedskade.
“Mpumalanga Landbou doen ’n beroep op die minister om die besluit om die minimum loon met meer as die huidige inflasiesyfer te verhoog dringend te heroorweeg. Die minister en sy adviseurs moet die ongunstige impak op die ekonomie en spesifiek op die reeds abnormaal hoë werkloosheidsyfer verreken.
“Die kommissie het goed gebalanseerde insette vanuit ons sektor ontvang. Die minister word versoek om hierdie insette te oorweeg en sodoende ’n verdere ramp in Suid-Afrika af te weer.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
