Die Nissan Navara-nuweling span die kroon op 80 jaar se ervaring en bied nou selfs beter werksvermoë en gerief as al sy lengendariese voorgangers saam, sê Mmnr. Xavier Gobile, die Nissan Group of Africa se direkteur vir verkope en bemarking.
Aanvanklik bied die Navara-reeks drie 4X4 dubbelkajuite met die keuse van ‘Mid’- of ‘High’-toerustingsvlakke asook die keuse van 'n sesgang-handratkas of 'n sewegang outomatiese ratkas. Alle modelle word aangedryf deur die nuwe 140 kW YS23DDRT 2.3 liter inlyn-viersilinder dieselenjin met twee turbo-aanjaers.
Nóg 'n interessante nuwigheid is die vyfskakel-spiraalveerstelsel vir die agter-as wat glo Nissan se oplossing is om goeie ritgehalte en hantering met vragdravermoë kombineer.
Skoon voorkoms van die vorige geslagDie bakwerp is netjies en die ontwerp bou voort op die stewige en skoon voorkoms van die vorige Navara-geslag. Natuurlik is daar talle nuwighede soos LED-dagligte en -flikkerligte wat nou deel van die verchroomde truspieëls is. Die (nou) swart B-pilaar en die dak wat 20 mm laer is, is nuwe ontwerp-elemente wat ook tot doeltreffender lugvloei bydra.
Die agterdeure se donker kantvensters, die 16 duim allooiwielvellings vir die ‘Mid’-weergawes en 18 duim allooiwielvellings vir ‘High’-weergawes rond die syaansig af. Die agterkant is nie afgeskeep nie en spog met nuwe agterligte en 'n hooggemonteerde remlig.
Die dubbelkajuit se laaibak is nou effe langer (1 503 mm) en effe dieper (474 mm) wat 'n laaivolume van 1 061 liter beteken. Die loonvrag is 1 002 kg en dit kan 'n sleepwa (gerem) en vrag van 3 500 kg sleep. Die grondvryhoogte is 229 mm met 'n naderhoek van 33 grade, ‘n oortreehoek van 25,2 grade en 'n vertrekhoek van 27,8 grade.
Bakkie weeg 176 kg minderDie leerraamonderstel is met hoësterkte staal versterk. Danksy nuwe materiale en ontwerpverbeteringe weeg die nuwe bakkie in teen 176 kg minder as sy voorganger.
Die hart van die Navara is gesetel in sy nuwe 2.3 liter enjin met twee turbo-aanjaers, deelbuistegnologie en direkte dieselinspuiting. Die enjin lewer 140 kW teen 3 750 r/min en 450 Nm vanaf 1 500 r/min tot 2 500 r/min.
Die kleiner van die twee turbo-aanjaers lewer 'n hoër druk teen die laer enjinsnelhede terwyl die groter turbo-aanjaer weer 'n laer druk lewer teen die hoër snelhede. Ieder geval belowe dit gladde werkverrigting met 'n gebrek aan turbo-traagheid en doeltreffende brandstofbenutting (6.5 l/100km volgens Nissan). Met die brandstoftenk van 80 liter is 'n reikafstand van meer as 1 000 km dan heeltemal moontlik.
Plaaslik beskikbaarDie nuwe Navara is aanvanklik slegs as 'n 4X4 dubbelkajuit plaaslik beskikbaar met pryse wat strek van R514 900 tot R597 900 (BTW ingesluit). Die 4X2-weergaes sal eers teen die einde van vanjaar beskikbaar wees en sal van R450 000 tot R520 000 (BTW ingesluit) kos.
Die nuwe Navara word vir ses jaar of 150 000 km gewaarborg en 'n diensplan van 3 jaar of 90 000 km is by die prys ingesluit.
Ek voorspel dat die nuwe Navara beslis gaan knaag aan die verkoopsyfers van die Hilux én die Ranger en dit is heeltemal moontlik dat hierdie skouerskuurdery in 'n kopstampery kan ontaard!
