Volgens mnr. Ernie Deyzel van die plaas Schuinspad in die distrik Steytlerville in die Oos-Kaap het dit vir hom gepla dat die pad, wat verby sy plaas se afdraai gaan, die hoofroete is vir mense wat veldry deur die Grootrivierpoort. “Die padnaamborde het so verbleik dat jy nie meer kon lees wat daarop staan nie.”
Hy het eendag ’n foto van die naamborde op ’n 4x4-groep geplaas en gevra vir borge.
Mnr. George Schaaf, eienaar van ’n 4x4-toebehorebesigheid in Gqeberha, LA Sport 4x4 Megastore, het aangebied om die borde te borg.
Hy het aanvanklik drie padborde vir die afdraai by Deyzel se plaas laat maak. Hy het ’n foto daarvan op die besigheid se Facebookgroep geplaas en gevra of daar nog plekke is wat plekborde benodig. Me. Rosemary Dorfling van ’n ander plaas in die omgewing het gereageer en Schaaf se besigheid het ook die afgeleefde padborde naby haar plaas vervang
“Ons is maar altyd betrokke by die boeregemeenskap, soos by boeredae en het ook al geld ingesamel vir droogtehulp vir boere,” sê Schaaf. “Ons is waar die boere is: Dit is ons kliëntebasis. As dit sleg gaan met die boere, gaan dit sleg met ons. En as dit goed gaan met die boere, gaan dit goed met ons."
Hy sê dit is veral belangrik om te help in ’n gemeenskap soos Steytlerville waar dit die afgelope paar jaar baie droog was.
LA Sport is ’n 4x4-toerustingsmaatskappy in Gqeberha, maar het ook takke elders in Suid-Afrika en spesialiseer in toebehore op bakkies soos tralies, kolligte, kappies en enige ander toebehore.
