Die standaarde, regulasies vir die klassifikasie, verpakking en bemarking van sekere rou verwerkte vleisprodukte wat vir handel in Suid-Afrika bestem is, vereis dat boerewors ’n minimum van 90% vleisinhoud en ’n vetinhoud van nie meer as 30% mag hê nie, terwyl slegs graan of stysel, asyn, speserye of sout, kruie en water as ander bestanddele gebruik mag word.
Die standaarde maak nou vir die eerste keer spesifiek melding van wat boerewors presies is. Dit het egter nie betrekking op geblikte vleisprodukte, verwerkte vleisprodukte of vegetariese produkte wat vleis namaak nie.
Die regulasies stipuleer dat rou boerewors gemaak moet word uit die vleis van ’n mak dier en geen afval mag bevat nie. Ander wors, wat nie as boerewors geklassifiseer of bemark word nie, moet ’n minimum van 75% vleis bevat van ’n mak dier of pluimvee en dit moet ook so gespesifiseer word. Hamburgerpatties moet ook minstens 75% vleis bevat.
Rouspesie-wors word gedefinieer as enige wors wat uit hoofsaaklik vleis van ’n spesifieke mak dierspesie, voël of wild bestaan, terwyl gemengde-spesie wors verwys na die meng van twee of meer dierspesies se vleis.
Slegs braaiwors, wat so bemark word, mag afval as bestanddeel hê, en moet uit minstens 40% vleis bestaan, of 60% vleis-ekwivalent met ’n vetinhoud van nie meer as 30% nie. Hierdie wors moet uit die vleis van ’n spesifieke mak dierspesie, voël of wild gemaak word en verskil van boerewors deurdat dit afgesien van afval, ook oor meganies-herwinde vleis, kleursel, vegetatiewe proteïen en ander voedselprodukte kan bestaan.
