Hy sê hy bly optimisties oor geleenthede in die landbou ten spyte van die verskeie probleme wat die sektor in die gesig staar. “Om in Suid-Afrika te boer vereis senuwees van staal, maar die geskiedenis het gewys dat boere en die landbousektor ten spyte van baie probleme altyd bereid is om te sorg dat daar kos op die tafel is.
“Deursettingsvermoë is ’n eienskap wat onteenseglik deel van ’n boer is en daarom is die wyse woorde van C.J. Langenhoven so gepas: ‘Laat ons nie so besig wees om kanse te soek dat ons die geleenthede een vir een laat verbyglip nie.’ ”
Botha is in 2014 aangestel as regsadviseur van Vrystaat Landbou se veiligheidsafdeling en is later bevorder tot bedryfsbestuurder.
Mnr. Francois Wilken, president van Vrystaat Landbou, sê die organisasie se bestuur is opgewonde oor Botha se aanstelling is. “Gernie is ’n man van integriteit, iemand op wie jy werklik kan staatmaak en sy liefde en toegewydheid vir die landbougemeenskap van die Vrystaat is opmerklik in sy optrede.”
