Die georganiseerde landbou, as die grootste waterverbruiker in die land, is bereid om me. Edna Molewa, nuwe Minister van Waterwese en Omgewingsake, ’n regverdige kans te gun. Sy sal egter aan dade gemeet word.
Molewa is in die plek van me. Bujelwa Sonjica aangestel.
“Ons is besorg dat daar met die aanstellings by verskeie departemente nie gekyk word na ministers met ’n mate van tegniese agtergrond nie. In die geval van Waterwese, waar ’n krisis aan die ontstaan is, is dit onregverdig om van ’n politikus te verwag om te weet wat die uitdagings is. Daarvoor is ’n kundige nodig,” het mnr. Johannes Möller, voorsitter van Agri SA en van die beleidskomitee vir natuurlike hulpbronne, gesê.
Hy sê ’n groot taak lê vir Molewa voor, veral op die gebied van besoedeling van waterbronne en die oplossing daarvoor, asook die beskikbaarheid van voldoende waterbronne op langer termyn. “Die oplossing is nie om net water van die landbou weg te vat nie. Nuwe bronne sal ontwikkel moet word vir veral stedelike ontwikkeling.”
Möller sê Agri SA wens die minister sterkte toe. Mnr. Louis Meintjes, ondervoorsitter van die TLU SA, sê hy vertrou dat sy “anders as haar voorganger” die belang van die landbou in waterverbruik en voedselproduksie sal besef en erken.
Lees meer in Landbouweekblad se uitgawe van 12 November 2010.
9 November 2010
