Die nasionale vergadering het Dinsdag die wysigingswetsontwerp op landbouprodukstandaarde en die wysigingswetsontwerp op veld- en bosbrande goedgekeur.
Die wysigingswetsontwerp vir die Wet op Landbouprodukstandaarde (Wet 119 van 1990) sal dit moontlik maak om produkte vir bestuursbeheerstelsels te oudit en dit maak voorsiening vir die heffing van tariewe deur aangewese persone op ’n kosteverhalingsbasis. Die wysiging maak dit ook moontlik vir die minister om regulasies te ontwikkel wat betrekking het op oudits en bestuursbeheerstelsels.
Die wysigingswetsontwerp op veld- en bosbrande wil die Wet op Veld- en Bosbrande (Wet 101 van 1991) aanpas om dit ook vir munisipaliteite en tradisionele rade moontlik te maak om brandbeskermingsverenigings te stig en om munisipaliteite, staatsentiteite en maatskappye in staatsbesit, openbare entiteite en enige ander staatsinstelling wat grond besit, verplig om by brandbeskermingvereingings aan te sluit. Die wetsontwerp brei ook die magte vir toegang tot en deursoek van persele, beslaglegging en inhegtenisnemings uit tot vredesamptenare en tradisionele leiers. Laastens wil dié wetsontwerp dié wet herdoop as die nasionale Veldbrandwet.
Albei wetsontwerpe is goedgekeur op aanbeveling van die portefeuljekomitees vir landbou, grondsake en landelike ontwikkeling en van bosbou, visserye en omgewingsake.
Albei stukke wetgewing is na die nasionale raad van provinsies gestuur vir oorweging.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
