Agri SA het omvattende gesprekke met die herversekeringsmaatskappy Munich Re, die plaaslike versekeringsmaatskappye soos onder andere Absa, Mutual & Federal en Santam, asook Graan SA gevoer. Die feite van die saak is dat herversekeringsmaatskappye, wat uit die aard van die saak oorsese maatskappye is, bepaal jaarliks by wyse van hulle eie risiko-ontledings, kapasiteite of limiete vir multi-risiko versekering. Hierdie praktyk vind wêreldwyd plaas. Die betrokke herversekeringsmaatskappy met wie Agri SA goeie betrekkinge het, het die versekering gegee dat die besluite van die betrokke moedermaatskappy na deeglike oorweging geneem is. Hoë versekeringseise in die verlede en ongunstige klimaatsfaktore die afgelope paar jaar, is faktore wat ’n groot rol gespeel het in beoordeling van limiete.
In die geval van die Noordwes-provinsie, is die vermindering van limiete van toepassing op die hele provinsie vir die komende seisoen. Dit het veroorsaak dat die plaaslike versekeringsmaatskappye noodgedwonge ook hulle eie kapasiteite of limiete afwaarts moes aanpas, waarna oesversekering gemeet teen dié kriteria wat elke maatskappye daarstel, beskikbaar gestel is.
Hierdie maatskappye het dan ook bevestig dat daar reeds met suksesvolle kliënte geskakel is en dat die kapasiteite vir multi-risiko ten volle opgeneem is, behalwe vir beperkte haelversekering, indien boere hierin mag belang stel. Die indruk is gelaat dat plaaslike versekeringsmaatskappye baie moeite gedoen het om die situasie te beredder.
Agri SA is bevrees dat daar werklik min is wat aan die huidige situasie gedoen kan word. Dit mag net gemeld word dat die regering se beoogde oesversekeringskema tans op hoë vlak bespreek word, maar dat dit ongelukkig te laat is vir die Noordwes-provinsie se probleem.
Die oorspronklike berig verskyn in Agri SA se elektroniese nuusbrief, e-Agri, en is deur mnr. Kosie van Zyl geskryf.
