Die olieprys gaan die volgende twee jaar hoog bly en dit kan die prys van $130 per vat oorsteek, meen Barclay’s Capital.
Me. Sudakshina Unnikrishnan, die vise-president van kommoditeitsnavorsing by dié bankgroep, sê dié verskynsel kan ‘n invloed op kommoditeitspryse hê, veral wat die etanolmark betref.
“Ons verwag die olieprys gaan in 2012 en 2013 hoog bly, wat tot ‘n groter fokus op etanol gaan lei, ten spyte van die ongunstige publisiteit wat dit die afgelope tyd kry,” aldus Unnikrishnan. Dié neiging kan veral ‘n invloed hê op die internasionale voorraad van suiker, mielies en sojabone.
Unnikrishnan sê weens dié rede en klimaatsverandering kan bio-brandstof in die langtermyn ‘n ál groter rolspeler word om opwaartse druk op kommoditeitspryse te veroorsaak. Sy het die media in Johannesburg toegespreek.
Vooruitsigte vir vanjaar
Unnikrishnan voorspel dat die koringmark in die eerste ses maande van die jaar nie gunstig gaan reageer nie. “Maar afwykings in weerstoestande in Rusland en ‘n swakker plantseisoen wat in die Oekraïne verwag word, sal pryse in die tweede helfte van die jaar hoog hou.”
Sy verwag wel dat die koringmark oor die algemeen voldoende voorraad sal hê. Daarenteen voorspel Unnikrishnan dat die mieliemark in die eerste semester goeie ondersteuning gaan ontvang, terwyl dit in die tweede semester van 2012 in die weegskaal kan hang.
Dié twyfelagtigheid word gebaseer op produksie in Suid-Amerika en weerstoestande wat die afgelope seisoen kleiner oeste veroorsaak het. “Ons sal moet sien wat die weer daar doen, want volgens die Amerikaanse departement van landbou word verwag dat die grootste oppervlakte mielies sedert 1964 vanjaar te wagte kan wees.”
Groot voorraad nie meer haalbaar
Wat terugval-voorraad betref, meen Unnikrishnan die wêreld sal nie weer die oormaat voorraad hê wat dit in die 1980’s en 1990’s gehad het nie. “Die vraag het net té veel gegroei. En selfs al beleef Amerika een baie goeie oesjaar sal dié voorraad nie weer opgemaak kan word nie.”
Wat ingryping met subsidies en regulasies deur regerings betref, meen Unnikrishnan die einde is nog nie in sig nie, “veral as weersomstandighede kleiner oeste veroorsaak en voedselsekerheid ‘n vraagstuk bly.”
17 Februarie 2012
