Die Omnia-groep se landbou-afdeling het in die ses maande tot 30 September goed gevaar. Sy inkomste het met 5,2% tot R2,8 miljard gestyg.
Dit terwyl die groep as geheel se inkomste met net 1,1% tot R7,6 miljard gestyg het en sy wins met 4,7% tot R404 miljoen gedaal het.
Omnia het in 'n verklaring gesê sy landbou-afdeling se bedryfswins het met 40,2% tot R171 miljoen gestyg danksy beter prestasie van sy verkorrelingsaanlegte, groter deursetvolume van die nuwe salpetersuur-kompleks en bykomende doeltreffendheid wat by ander stroomaf-aanlegte bereik is.
Hierteenoor het die mynafdeling se inkomste met 2,7% tot R2,7 miljard gedaal en die chemiese afdeling s’n het marginaal tot R2 miljard gestyg.
Die Omnia-groep as geheel se bedryfsmarge was bestendig op 8,3% en sy verhouding van skuld tot eie kapitaal het van 35,7% tot 29,7% verbeter.
Mnr. Rod Humphris, hoof uitvoerende beampte, sê in die verklaring die groep se chemiese afdeling was steeds onder druk en laer kommoditeitspryse het tot ‘n verstadiging in sy mynafdeling gelei.
Die swakker rand teen die Amerikaanse dollar het ’n gunstige invloed op verkoopspryse in al drie Omnia se afdelings gehad, maar het terselfdertyd die koste van ingevoerde grondstowwe en ander produksiekoste verhoog.
Humphris verwag dat die landbou-afdeling soos gewoonlik in die tweede halfjaar goed sal presteer.
Hy sê mieliepryse sal na verwagting op kort termyn laer as in die vorige jaar wees, wat tot ’n matige oorskakeling van mielie-aanplantings na ander gewasse soos sojabone en sonneblomme kan lei.
Omnia verwag daarom dat sy verkope van kunsmis aan bestaande markte marginaal minder kan wees maar nuwe markte en nuwe produkte kan deels of heeltemal hiervoor vergoed.
Die groep het ’n tussentydse dividend van 190c verklaar.
