Die aanplanting van gewasse wat met behulp van biotegnologie verbeter is, het in 15 jaar wêreldwyd van minder as 2 miljoen ha tot meer as 160 miljoen ha toegeneem.
Dit is die landbou-tegnologie waarby die beste in die moderne geskiedenis aangepas is. Die internasionale diens vir die bevordering van landboubiotegnologie (ISAAA) het bekend gemaak dat die aanplanting van geneties gemodifiseerde (GM) gewasse verlede jaar wêreldwyd met 12 miljoen ha toegeneem het – ’n jaarlikse groeikoers van 8%.
Mnr. Clive James, voorsitter van die ISAAA, sê die ongekende toename in die aanvaarding van die tegnologie wys dat daar oorweldigende vertroue in biotegnologie- gewasse by miljoene boere bestaan.
Ontwikkelende lande
“Sedert dié gewasse in 1996 kommersieel beskikbaar gestel is, het boere in 29 lande meer as 1,25 miljard ha met GM gewasse beplant of weer beplant. Dit is ’n oppervlak wat 25% groter is as die gesamentlike grondgebied van Amerika en China saam.”
Ontwikkelende lande neem die voortou met die aanpassing by die tegnologie. Die groeikoers in dié lande was verlede jaar 11% teenoor 5% in ontwikkelde lande. Ontwikkelende lande plant reeds sowat die helfte van biotegnologie- gewasse en sal na verwagting aanstaande jaar die nywerheidslande verbysteek.
13 Februarie 2012
