Die middelklas het nie genoeg geld om groente te koop soos voorheen nie. Só meen mnr. Carl Gathmann, ’n groenteboer van KwaZulu-Natal.
Oor die afgelope twee weke het uie van ’n gemiddelde prys van R30 per 10kg-sakkie na minder as R24 gedaal. Aartappels het op sommige markte, soos Durban en Pretoria, tussen R33 en R50 per 10kg-sakkie gewissel en wortels se prys het in ’n week verdubbel van R3/kg na R6/kg.
“Produksie en aanbod-volume speel natuurlik ’n rol, maar nie so drasties nie; daar is eenvoudig nie koopkrag op die mark nie en dit veroorsaak dat die prys meer gevoelig is vir skommelinge as normaal,” verduidelik Gathmann.
Ongunstige weersomstandighede op sommige plekke, soos die uitermatige nat weer in Brits, het veroorsaak dat aanbod-volumes, soos met wortels, skielik gedaal het en die prys op markte baie wisselvallig is.
