Die groenskrif oor grondhervorming kan ongrondwetlik wees het mnr. Gugile Nkwinti, Minister van Grondhervorming en Landelike Ontwikkeling gesê, aldus die Demokratiese Alliansie (DA).
Luidens ‘n DA-verklaring het Nkwinti glo Dinsdag (20 September 2011) tydens ‘n voorlegging aan die portefeuljekomitee, aan die departement te kenne gegee dat die groenskrif “ongrondwetlik kan wees”.
Volgens die party het Nkwinti ook gesê dat die institusionele beperkinge in sy departement nie in ag geneem is voordat die dokument saamgestel is nie. Die DA het Nkwinti derhalwe versoek om die groenskrif in sy huidige formaat te onttrek en ‘n goed nagevorsde dokument daar te stel.
Verander die Grondwet
Me. Lindiwe Mazibuko van die DA, het die minister uitgevra oor die ongrondwetlikheid van die waardeerder-generaal en die grondbestuurraad wat voorgestel word. Hy het glo daarop geantwoord deur te sê “ek sal my op die Kabinet beroep om die Grondwet te verander.”
Mazibuko het ook vrae gestel oor die feit dat die departement se interne beperkinge en die vertragende invloed wat dit op grondhervorming het, nie in die dokument ingesluit is nie. Die minister se terugvoer was glo dat daar “te veel” was om dit in te sluit.
Nkwinti het na bewering ook aangedui dat die groenskrif se voorstelle oor die regulering van buitelanders se grondbesit totaal ideologies is en nie op enige navorsing oor die land se eienaarskapspatrone gebaseer is nie.
20 September 2011
