Dít is die mening van ’n boer wat nou die prys moet betaal vir beeste wat onwettig uit hierdie gebied na Gauteng gebring is en veroorsaak dat veilingskrale en omliggende plase by Onderstepoort onder kwarantyn geplaas is. Bek-en-klouseer is al op verskeie plase in Noordwes, die Vrystaat en Gauteng bevestig ná die onwettige vervoer van beeste.
Mnr. Hans Terblanche is ’n Brahman-boer wat ook as veilingsagent vir Vleissentraal-Bosveld by die veilingskrale optree. Elke Woensdag is daar ’n veiling waar honderde stuks vee ter waarde van miljoen rande uit omliggende gebiede opgeveil word. Nou is die veilingskrale en sy naasliggende plaas onder kwarantyn. ’n Man van Wallmansthal buite Pretoria het beeste uit die beheerde gebied na ’n veiling op 30 Maart gebring.
Terblanche sê hulle het alles moontlik gedoen om ná die uitbreking van bek-en-klouseer in 2019 in Limpopo aan die streng biosekerheidsmaatreëls te voldoen. “Ons het bykans R900 000 bestee om alles gereed te kry vir die strenger biosekerheidsregulasies en ons het ’n vierster-gradering ná ’n inspeksie van die landbouprodukte-agenteraad (APAC) gekry.”
