Voedselsekerheid gaan in die toekoms − en die res van ons lewens − een van die belangrikste maatskaplike en politieke kwessies ter wêreld wees, voorspel dr. Daniel Silke, internasionale politieke ontleder.
Hy het op Landbouweekblad en AMT se konferensie in Pretoria gesê oorloë sal nog in die toekoms daaroor woed. Hy sê die wêreldbevolking sal met 20% tot 10 miljard oor die volgende 40 jaar toeneem. Dit is die grootste toename nóg.
Daarteenoor is Afrika die “laaste vesting” vir kommoditeitsproduksie. Lande buite Afrika het reeds 50 miljoen ha grond in Afrika bekom vir landbouproduksie. “Dit is twee keer die grootte van Brittanje. Dit wat in Afrika geproduseer word, sal buite Afrika benut word.”
Silke sê teen 2050 sal ’n kwart van die wêreld se bevolking in Afrika woon.
Vir Suid-Afrika en sy landbousektor is dit goeie nuus, want Suid-Afrika is die poort na die res van Afrika. Suid-Afrika bevind hom egter by ’n dramatiese draaipunt. As daar nie nou die politieke wil is om drastiese verbeteringe aan die energie-, water- en landbou-infrastruktuur aan te bring nie, sal dit binne die volgende paar jaar ernstige gevolge hê, aldus Silke.
Water sal in die toekoms ook ’n groot geskilpunt word met 1,4 miljard mense in 36 lande wat teen 2025 nie meer voldoende vars water sal hê nie.
6 Oktober 2010
