Heinings op wildplase is ’n groot uitdaging vir jagondernemings wat Suid-Afrikaanse jagte aan buitelanders bemark, sê die Beroepsjagtersvereniging van Suid-Afrika (Phasa) se voorsitter, mnr. Dries van Coller.
Van Coller het by die onlangse wildberaad by Castle de Wild naby Modimolle gesê boere moet besef dat buitelanders droom van ’n Afrika-ervaring wanneer hulle kom jag en dat wildskampe en bokke met kleurvolle plastiese oorplaatjies daardie droom vir hulle bederf.
Van Coller beveel aan dat boere wat jag en teelprojekte op dieselfde plaas bestuur hul paaie en kampe so uitlê dat besoekende jagters nie tussen teelkampe hoef deur te ry na jagkampe nie.
Hou dit interessant
“Moet ook nie lang, reguit paaie langs heinings laat afloop nie, hou dit interessant vir jou gaste en laat die pad wat hulle van die plaashek na die jagkamp ry deur die bos kronkel.”
Hy wys ook daarop dat ander lande in Afrika teen Suid-Afrika se teelprojekte bemark deur te sê dat daar nie in “klein kampies” agter “hoë heinings” met wild soos plaasdiere geboer word nie. Boonop verloor sommige jagondernemers kliënte omdat hulle een of ander tyd ’n bok met ’n oorplaatjie in die veld sien en dan voel hulle is om die bos gelei om op “mak” wild te kom jag.
Van Coller sê jagondernemers het die wildbedryf se hulp nodig om die besoekende jagters se droom van ’n Afrika-ervaring so na as moontlik aan die werklikheid te bring.
