Wanneer die inkomste uit melkboerdery met dié van ander veevertakkings in die Oos-Kaap vergelyk word, is die prentjie nie so sleg as wat dikwels voorgegee word nie, sê mnr. Simon Matthews voorsitter van die Oos-Kaapse Melkprodusente-organisasie (MPO).
Hy het op die vereniging se jaarkongres in Port Elizabeth gesê dat die gemiddelde melkprys in die provinsie van R3,80 per liter ’n jaar gelede met 12% gestyg het tot die huidige R4,25 per liter. Hoewel die vaste koste die afgelope jaar met meer as die inflasiekoers gestyg het, het die prys van hoë konsentraat voer die afgelope twee maande merkbaar gedaal. “Indien melkpryse die opwaartse neiging voortsit, mieliepryse op die vlakke bly waar dit nou is en daar vroeë lentereëns val, sal dit nog beter met die bedryf kan gaan.”
Matthews het gesê die Oos-Kaap is nou die grootste melkvoorsiener in die land met produksie wat die afgelope tien jaar verdubbel het. Hoewel die nasionale produksie nou effens laer is as ’n jaar gelede, dui vooruitskouings daarop dat die produksie van 2,8 miljard liter baie dieselfde sal wees as die vorige seisoen. Die invoerpariteit het van R7 per liter tot R5,60 per liter in Junie gedaal. “Dit is ’n normale seisoenale verskynsel en ’n regstelling kan weer verwag word.”
Hy het gesê hoewel net sowat 30% van die Oos-Kaapse MPO-lede die inligtingsdae wat in die herfs gehou was bygewoon het, is die kommunikasie in die organisasie baie gesond en daar word op nasionale vlak baie gedoen om melkprodusente ingelig te hou.
