“Ek het die Saterdag ná die vloede ’n oproep van mnr. Oscar Mabuyane, Oos-Kaapse premier, ontvang. Hy het gevra of ons bystand kan bied aan ’n aantal mense wat hul huise verloor het,” sê mnr. Edgar Brotherton van Just Milk.
“Ons het die Sondagoggend ons eerste vrag melk verskaf en het aangehou om elke week daarna melk te verskaf aan mense wat weens die vloede haweloos gelaat is.”
Hy sê een van Just Milk se vennote, Meat Traders, wat ook in Komani is, het vleis aan die slagoffers geskenk.
Volgens Brotherton het hulle ondersteuning van die plaaslike Rotariërklub gehad.
“Namens die Rotariërklub van Lukhanji Sunset wil ons ons dankbaarheid uitspreek vir ’n ruim skenking aan die slagoffers van kitsvloede in Queenstown (Komani). Jul skenking van 230 kg beesvleisbene en 80 liter melk sal ver gaan om baie nodige lewensmiddele te bied aan diegene in nood, veral dié wat tans by die Gali Thembani-seuntrum woon,” het die Rotariërklub van Lukhanji Sunset op sy Facebookblad geplaas.
Komani is in Februarie deur verskeie opeenvolgende vloede getref weens swaar reën in die gebied. Verskeie mense in veral informele nedersettings in laaggeleë dele is haweloos gelaat. Die vloede het ook tot lewensverliese en infrastruktuurskade op die dorp gelei.
“Die mense wat geraak is, is ons mense. Verskeie werk vir ons groep of het familie en vriende wat vir ons werk. Dit is die minste wat ons kon doen,” sê Brotherton.
