Ná die moord op mnr. Brendin Horner in die distrik Paul Roux in 2020 het boere in die Oos-Vrystaat verskeie vergaderings met onder meer mnr. Bheki Cele, minister van polisie, oor die benarde situasie rondom veediefstal in die Oos-Vrystaat en die beweerde betrokkenheid van polisiebeamptes gehad, maar niks het verander nie.
Boere, die georganiseerde landbou en sekuriteitsgroeperings het verlede week op Bethlehem vergader om die situasie te bespreek. Die polisie is nie na die vergadering genooi nie, aangesien die belanghebbendes voel dat hulle nie die polisie meer kan vertrou nie.
Mnr. Eduard Marais, woordvoerder, sê: “Die primêre doel met die vergadering was eerstens om ’n drukgroep saam te stel om weer die betrokkenheid van korrupte polisiebeamptes uit te wys en te laat ondersoek.
