Mielieboere se produktiwiteit het drasties verbeter wat bewys die wetenskap is geslaagd en lewer resultate sover dit doeltreffender kosproduksie betref, het mnr. Adam Mostert, hoof uitvoerende beampte van die Misstofvereniging van Suider-Afrika (Fertasa), op die vereniging se simposium oor grondvrugbaarheid en plantgesondheid by die WNNR in Pretoria gesê.
Die jongste oesskatting dui op ’n verwagte oes van 14,017 ton, die grootste oes in 33 jaar. As dit met 1980/’81 se rekord-oes vergelyk word, is dit duidelik at boere se produktiwiteit het die laaste 33 jaar dramaties verbeter. Daardie rekordoes het 14,4 miljoen ton beloop en is op 4,338 miljoen hektaar grond teen gemiddeld 3,33 ton per hektaar geproduseer. Vanjaar se oes is op 2,6 miljoen hektaar geplant en die gemiddelde opbrengs was 5,2 ton per hektaar.
Hy het die verbetering aan die onttrekking van marginale grond aan gewasproduksie en beter kultivars, gewasbeskerming, onkruidbeheer, grondvoorbereiding, bewerkingsmetodes, grondvrugbaarheid en plantgesondheid toegeskryf.
“Dit bewys die wetenskap is geslaagd en lewer resultate in die vorm van doeltreffender voedselproduksie. Ons doen iets reg. Dit beteken egter nie ons weet alles en dat ons nie verder kan verbeter nie. Inteendeel, ons staan nog voor ’n groot uitdaging om die teoretiese potensiaal van die omskakeling van sonenergie na gewasopbrengs te bereik,” het Mostert gesê.
Die styging in opbrengs plaas meer druk op die grond en ander hulpbronne; vandaar die besluit om vanjaar se simposium aan grondvrugbaarheid en plantgesondheid te wy.
