Groot opgewondenheid heers oor die landbou en 2011 kan ‘n goeie jaar vir die bedryf wees, sê mnr. Ernst Janovsky, hoofbestuurder van Absa AgriBesigheid.
Hy het by ‘n vooruitskattingsfunksie in Centurion gesê ondanks die lae pryse wat verskeie sektore van die landbou teister, is die bedryf steeds gesond. “Die krane kan oopgedraai word ten opsigte van die landbou.”
Kommer bestaan wel oor die Europese mark rakende onsekerheid oor bestedingspatrone en hoe dit die vasteland se invoere en uitvoere gaan raak.
Rentekoerse nog laer
Janovsky meen weens die herstel na die ekonomiese resessie en lae rentekoerse is dit tans ‘n goeie tyd om plaaslik in die landbou en in sakeondernemings te belê. Hy voorspel dat rentekoerse vir tot twee jaar nog op lae vlakke kan beweeg.
“Om die ekonomiese herstel nog te stimuleer en die herstel te verbeter dink ek rentekoerse moet met nog sowat twee punte verlaag word, maar vir so ‘n besluit het ‘n mens baie binnegoed nodig,” aldus Janovsky.
Hy voorspel verder dat mieliepryse in die komende jaar tussen R1 300 en R1 500 per ton gaan beweeg, wat baie goeie nuus vir mielieboere kan wees mits die rand teenoor die dollar verswak. “Wat suiwel aanbetref kan nog ‘n sowat 20c per liter-daling aan boere voorkom, maar dit is steeds ‘n winsgewende bedryf as die goedkoop voerpryse in ag geneem word.”
Veranderinge
Volgens Janovsky kom ‘n verandering ten opsigte van die aanhou van vleisbeeste in die Wes-Kaap tans voor. “ ’n Mens sien baie vee wat in graangebiede inbeweeg”. Hy meen dat veranderinge wel in die voerkraalbedryf oorweeg sal moet word rondom voer, met kontrakvoer wat meer belangrik gaan raak om byvoorbeeld ‘n 100% kapasiteit te hê.
Die graanbedryf “bloei” tans, en Janovsky meen dat ‘n groot swaai ten opsigte van mielies in die toekoms sal plaasvind wat kan lei tot 50/50-produksie van mielies en sojabone.
Nog ‘n verwagte verandering is dat groot winsgewende boerderye groter gaan word weens konsolidasie met kleiner boerderye wat sukkel om te oorleef. “Meer as 80% van die land se produksie word deur minder as 10 000 kommersiële boere gelewer, terwyl ‘n verdere 30 000 op ‘n kleiner skaal boer,” sê Janovsky.
9 Desember 2010
