Die milde reën oor groot dele van die land skep ’n teelaarde vir virussiektes by vee wat deur muggies, muskiete en bytende vlieë oorgedra word, se dr. Faffa Malan, bestuurder van RuVasa (Herkouer-veterinêre Vereniging van Suid-Afrika).
Hierdie siektes is bloutong, Slenkdalkoors, Wesselsbronsiekte, drie-dae-stywesiekte, knopvelsiekte en perdesiekte. Teen virusse is daar geen behandeling nie; daarom moet diere voorkomend ingeënt word. Die siektes word simptomaties behandel. Veeartse kan waardevolle raad gee.
Dié situasie word vererger deur ’n tekort aan entstowwe wat deur Onderstepoort Biologiese Produkte (OBP) vervaardig word.
Malan sê weens hierdie tekort is daar ’n groot aantal diere wat nog nie ingeënt is nie. Boere moet dus sorg dat hulle insekbeheer toepas deur diere met piretroïede wat insekte beheer, te behandel en hulle weg te hou van riviere, vleie en strome sodra die eerste tekens van hierdie siektes voorkom.
Die eerste gevalle van bloutong is reeds in die Wes-Kaap aangemeld, wat vroeër as gewoonlik is.
Namate entstowwe weer beskikbaar word, moet jong diere wat nog nooit voorheen ingeënt is nie, eerste ingeënt word.
Verdere inligting oor al hierdie siektes is beskikbaar op www.landbou.com in die rubriek Vra vir Faffa waar hy en ander kenners vir boere raad gee.
Malan sê knopvelsiekte kan nou ook deur sekere soorte bosluise veroorsaak word, is onlangs bevind. Vir hierdie siekte is daar wel entstof van farmaseutiese maatskappye beskikbaar.
“Ek vertrou OPB se entstowwe sal eersdaags weer beskikbaar wees, soos wat hulle onlangs aangedui het,” sê Malan. “Hopelik het hulle nou hul probleme met vervaardiging opgelos en kan broodnodige entstowwe nou weer beskikbaar raak. Boere moet hul plaaslike veearts, landboumaatskappy of ander verskaffers vir voorrade kontak.”
Hy raai veeboere aan om hul veeartsenykundige program met ’n veearts te bespreek om probleme met abortering by dragtige diere en onvrugbaarheid by manlike diere te vermy wanneer entstowwe verkeerd toegedien word.
