Mnr. Jannie Spangenberg (67) is
onlangs dood nadat hy geskok is terwyl hy glo ’n transformator wat aan sy
Zwartbooisberg-boerdery se grootskaalse sonkragstelsel gekoppel is, ondersoek
het.
Mnr. Wiaan van Rensburg, voorsitter van die Kakamas-landbou-unie, sê die gemeenskap is in skok en rou. “Oom Jannie was ’n oop mens. Hy het ’n oop hart, ’n oop gemoed en ’n oop hand teenoor kerke, skole en die hele landbou- en dorpsgemeenskap hier gehad. Hy wou net hê alle tipe mense moet die lewe geniet.
“Opgee was ook nie iets van hom nie. Hy sou altyd met ’n plan vorendag kom as ’n probleem opduik. Hy het voluit geleef. Oom Jannie het in die Augrabies-omgewing grootgeword en baie jare lank hier by Kakamas geboer. Hy was in alle opsigte ’n Oranjerivier-seun.”
Mnr. Jock Brown, voorsitter van Suid-Afrika se vereniging vir hernubare energiepraktisyns (AREP) en tegniese direkteur van Broadreach Energy, sê Spangenberg se dood is “uiters hartseer”.
Brown sê hoewel die konsep van sonkrag as ’n bron van hernubare energie reeds baie jare lank bestaan, word steeds na die vinnig groeiende private gebruik daarvan reg oor die wêreld, insluitend in Suid-Afrika, verwys as ’n “opkomende tegnologie”.
“Talle energiestelsels hou inherente risiko’s in. Aangesien private sonkrag relatief nuut is, pas ons bestuursmeganismes toe om die risiko’s te verminder. In Suid-Afrika ontwikkel ons opleidingsprogramme spesifiek vir sonkrag. Dié sal mense leer hoe om sonkragstelsels veilig te installeer en daarmee te werk.”
Hierdie opleiding sluit tans AREP se P4-program en die Suid-Afrikaanse Fotovoltaïese Bedryfsvereniging se PVGreenCard-program in.
Brown wys daarop dat die gelykstroom- én die wisselstroomelektrisiteit wat deur, binne en van ’n sonkragstelsel vloei, skadelik of dodelik vir ’n mens kan wees. As iemand dus nie al die nodige voorsorgmaatreëls tref voordat hy met so ’n stelsel en sy verbindings met die nasionale of huishoudelike kragnetwerk werk nie, loop hy die risiko van ernstig beserings of noodlottige elektrokusie.
“Selfs die elektrisiteit van net een 52 V-sonpaneel op ’n huis se dak het die potensiaal om jou ernstig te beseer. Daar is ook die kleiner sogenoemde kampeersonkragstelsels. Dit het ook die potensiaal om mense seer te maak, en kan selfs ’n klein kind in die hospitaal laat beland.
“Die belangrikste ding om te onthou met kleiner stelsels is om eers al die instruksies te lees en te verstaan. Vir ’n groter stelsel moet die eienaar toepaslik gekwalifiseerd wees om daaraan te werk en, indien nie, moet hy iemand aanstel wat is.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
