Pannar Saad en Pioneer Hi-Bred gaan hul samesmelting na die Mededingingstribunaal verwys vir heroorweging, nadat die Mededingingskommissie dit verlede week afgekeur het.
Luidens ‘n verklaring sê Pannar hy meen dat die stap tot voordeel van voedselsekerheid in Afrika sal wees aangesien hy produkte vinniger sal kan ontwikkel en aan boere sal kan vrystel.
“Ons huldig die mening dat die redes aangevoer ter afkeuring van die transaksie verdere vertoë aan die mededingingsowerhede regverdig. Daarom beplan die betrokke partye om die besluit na die Mededingingstribunaal te verwys vir heroorweging,” lui die verklaring.
Nie oortuigend
Intussen sê die Mededingingskommissie die samesmelting is afgekeur omdat die redes wat deur die maatskappye aangevoer word, nie oortuigend is nie.
“Die kommissie het die eise wat deur die maatskappye gemaak word - dat die transaksie sal lei tot tegnologiese, doeltreffendheid- en mededingende voordele deur hulle kiemplasma te kombineer en nuwe telingstegnologieë voor te stel – oorweeg. Die kommissie het egter bevind dat die potensiële voordele wat deur die partye uitgewys is nie oortuigend is nie en nie swaarder sal weeg as die onmededingende skade wat die samesmelting kan aanrig nie,” aldus die kommissie.
Hoër pryse
Mnr. Shan Ramburuth, kommissaris van die kommissie, sê mielies is ‘n stapelvoedsel in Suid-Afrika, en hoër vlakke van konsentrasie in die saadmark kan lei tot laer vlakke van innovasie. Hy meen dit kan ook lei tot prysverhogings wat boere en verbruikers kan benadeel.
Volgens die kommissie mag die betrokke partye hulle na die tribunaal wend vir ‘n heroorweging van die besluit. Intussen het Pioneer Hi-Bred verlede week sy teleurstelling oor die besluit uitgespreek, terwyl Biowatch verheug is oor die besluit, aangesien hy verskeie bekommernisse oor die samesmelting gehad het.
Volgens ‘n verklaring het die organisasie dié kwessies tydens vergaderings en in geskrewe dokumente aan die kommissie bekend gemaak.
13 Desember 2010
