Ernstige misdaad in boerderygemeenskappe het in die jongste feestyd merkbaar afgeneem teenoor onlangse jare, luidens voorlopige verslae. Bronne in die georganiseerde landbou skryf dit toe aan beter paraatheid deur boeregemeenskappe, groter pogings deur plaaslike polisie in sommige gebiede, en selfs die swaar reën oor dele van Suid-Afrika.
Leiers van agt van Agri Suid-Afrika se nege provinsiale lede-organisasies het hul verligting uitgespreek dat hul onderskeie boerderygemeenskappe geen, of baie min, plaasaanvalle of ernstige rooftogte gedurende die feestyd ervaar het. Agri Limpopo het teen druktyd nog nie op Landbouweekblad se navrae gereageer nie.Byna al die verteenwoordigers met wie Landbouweekblad gepraat het, het gesê hulle glo dat landelike misdaad in die feestyd grootliks afgeneem het vanweë faktore soos wydverspreide sekuriteitskameranetwerke, verhoogde waaksaamheid en beskerming op plase, en verbeterde verhoudings tussen boere en private sekuriteitsmaatskappye en, in sommige gevalle, plaaslike polisie.
Mnr. Jakkals le Roux, voorsitter van Vrystaat Landbou se landelike veiligheidskomitee, het gesê dat swaar reënval gedurende die afgelope feestyd waarskynlik misdaad in die Vrystaat teengewerk het. Vol riviere, modderige lande en veld, en verspoelde paaie sou misdaad moeilik gemaak het.
Dit was egter ongelukkig nie net goeie nuus wat misdaad betref nie.
Mnr. Robert Davel, uitvoerende hoof van Mpumalanga Landbou, het gesê ’n besonder ontstellende misdaad in Mpumalanga gedurende hierdie tydperk was ’n hoogs georganiseerde rooftog op die Zonnebloem Boerdery naby Middelburg.
Die landboubesigheid se sekuriteitswagte is glo aangehou terwyl die misdadigers hul eie vragmotors gebruik om swaardiens-plaassleepwaens, plaasvoertuie, verskeie boerderywerktuie en werkswinkeltoerusting, en R300 000 kontant te steel. Die waarde van die gesteelde toerusting en kontant is glo meer as R3 miljoen.
Mnr. Naudé Pienaar, adjunkhoofbestuurder van Agri Noordwes, het gesê dat hy voorlopige verslae ontvang het van twee inbrake op plase tussen Kersfees en Nuwejaar. Hoewel dit aansienlik minder was teenoor die ooreenstemmende tydperk die afgelope jare, sê Naudé een misdaadvoorval is steeds een te veel.
Veediefstal – vir potslag en diefstal deur sindikate – het ’n probleem in die meeste provinsies gebly. Slagoffers het gewissel van klein- tot grootskaalse vee-eienaars.
Mnr. Joe Scholtz, hoof van Agri Noord-Kaap se afdeling vir landelike veiligheid en veediefstal, het gesê benewens die diefstal van vee en vars produkte is dit ook kommerwekkend dat daar ’n toename in onwettige jag met honde en die onwettige oes en handel in beskermde vetplante plaasgevind het.
Vandalisme en diefstal van landelike infrastruktuur, soos kraglyne en selfoontorings, gedurende die afgelope feestyd was ’n algemene klagte onder talle provinsiale verteenwoordigers van die georganiseerde landbou.
Mnr. Jannie Strydom, uitvoerende hoof van Agri Wes-Kaap, het gesê net voor Kersfees het diefstal van Eskom-kabels in die Weskus-streek kragonderbrekings veroorsaak. Dit is ’n voortdurende kwessie wat aangepak sal moet word.
