Pioneer Foods bied KWV R827 764 500, oftewel R12 per gewone aandeel, aan om dié ikoniese drankmaatskappy by sy huidige portefeulje van voedselprodukte te voeg.
Volgens ‘n tweede gesamentlike omsigtigheidsaankondiging is dié bedrag saamgestel uit ‘n premie van 10,93% van die geweegde gemiddelde handelsprys van KWV Holdings se aandele vir die 30 dae wat 13 Oktober – toe die eerste omsigtigheidsaankondiging gedoen is – voorafgaan.
‘n Kwart van die totale bedrag (sowat R207 miljoen) sal met Pioneer Foods-aandele, wat op die JSE gelys is, betaal word. Dit word teen R49,83 per aandeel gewaardeer. Die balans (ongeveer R620 miljoen) sal in kontant betaal word.
Alle aandeelhouers sal binnekort die geleentheid kry om dié aanbod te oorweeg en daarvoor of teen te stem.
Regverdig en deursigtig
Die KWV se raad het ‘n subkomitee van direkteure gevorm om toe te sien dat die proses enduit regverdig en deursigtig verloop. ‘n Onafhanklike kundige is ook aangestel om ‘n onafhanklike mening te gee sou die voorgestelde transaskie voortgaan.
“KWV se direksie tree op in die beste belange van al sy aandeelhouers,” sê mnr. Thys du Toit, voorsitter.
“As ‘n ikoon in die wynbedryf, met ‘n geskiedenis van 92 jaar, is KWV diep gesetel in die harte van die mense van die Wes-Kaap. Die maatskappy se emosionele eienaarskap is baie breër as wat die aandele aandui, en dit is iets van die KWV-direksie erken en respekteer.”
Hy sê hoewel KWV die potensiële raakpunte tussen die twee maatskappye – soos uitvoere en bemarking – wil ondersoek, bly sy kernfokus die onderneming se prestasie en die vind van nuwe groeigeleenthede vir wyn en brandewyn.
Lees ook: Pioneer soek KWV in sy stal
3 Desember 2010
