Pioneer Foods het in ooreenstemming met sy ooreenkoms met die Mededingingskommissie sy brood- en meelpryse verlaag.
Dié ooreenkoms is aangegaan nadat die kommissie die maatskappy skuldig bevind het aan onder meer knoeiery met broodpryse.
Die verlagings behels:
Die prys van wit- en bruinbrood is op 3 Desember met 30 sent per brood verlaag, en dié verlaging word toegepas bo en behalwe die spesiale aanbiedinge wat kleinhandelaars dalk mag bied.
Die prys van meel is verlaag met R350 per ton vanaf 10 Desember.
Die kommissie sê hy het met die verskeie handelaars in verbinding getree om seker te maak dat die prysverlagings na verbruikers deurgegee word.
Die ooreenkoms
Na aanleiding van die ooreenkoms moet die maatskappy sy wins met R160 miljoen verlaag, vergeleke met ‘n bepaalde tydperk in die vorige boekjaar. Die maatskappy moet elke tweede maand ‘n vorderingsverslag by die kommissie inhandig en PriceWaterhouseCoopers sal die verslae nagaan om te verseker die maatskappy voldoen aan die ooreenkoms.
Die Mededingingstribunaal het verlede maand bevind dat die maatskappy weens onmededingende praktyke in onder andere die pluimvee- en meulenaarsbedryf, ‘n verdere boete van R500 miljoen aan die Tesourie moet betaal. Die boete sou eers verdeel word tussen die Tesourie en ‘n agri-mededingendheidsfonds, maar die Tesourie het daarteen appél aangeteken.
Die maatskappy is vroeër ‘n boete van meer as R190 miljoen opgelê vir sy betrokkenheid in die broodkartel.
15 Desember 2010
