Geen verbetering bestaan in die aantal plaasmoorde vanjaar vergeleke met verlede jaar nie. “Inteendeel, die situasie is selfs slegter,” sê mnr. Henry Geldenhuys, vise-voorsitter van TLU SA en ook voorsitter van die veiligheidskomitee.
Met die bekendmaking van TLU SA se plaasaanvalsyfers tot en met Julie vanjaar, blyk dit dat die aantal moorde op plase dieselfde gebly het, maar dat die aanvalle op plase toegeneem het.
“Sedert Januarie vanjaar het daar volgens TLU SA se statistiek 42 moorde op plase plaasgevind. Dit is dieselfde as in 2013, maar die aanvalle op plase het toegeneem van 142 in dieselfde tydperk verlede jaar, tot 158 sover hierdie jaar.
“Weer eens het daar gevalle voorgekom waar mense tydens die aanvalle erg gemartel is,” sê Geldenhuys. “Wat ons bekommer, is dat ons president swyg oor die voortgaande onveiligheid in sy eie land, en in besonder op die plase, waar die land se voedsel verbou word. Die Regering se prioriteite is heel duidelik verkeerd. Hy probeer internasionale aansien werf terwyl die mense in sy eie land verwaarloos word,” is mnr. Geldenhuys se beskuldiging.
“Die klimaat in die land is steeds gespanne, en pamflette soos dié wat by die Noordwes-Universiteit versprei word waarin daar weer ’n oproep is om boere en hulle taal te vermoor, skep ’n uiters plofbare klimaat, en dek die tafel vir nog meer aanvalle op plase, aangesien die Regering in al elf tale daaroor swyg. Boere moet hulle paraatheid verskerp,” het Geldenhuys gesê.
Bron: TLU SA.
