‘n Plaaswerker is dubbele lewenslange tronkstraf opgelê vir die wrede moorde op ‘n Oos-Vrystaatse boer en sy vrou.
Luidens ‘n berig op Volksblad.com is Petrus Ndaba dié straf opgelê na hy op 5 Januarie vanjaar die 63-jarige mnr. Koos van Zyl en sy 66-jarige vrou, Retha, op hul plaas Poortjie in die Senekal-distrik, vermoor het.
Hy het die egpaar albei eers gesteek waarna hy hulle met hulle haelgeweer geskiet het. Ndaba is kort voor die voorval as werker op die plaas afgedank.
Ndaba is ‘n verdere 15 jaar tronkstraf opgelê op ‘n aanklag van roof.
Parool eers oor 25 jaar
Ndaba sal volgens die aanklaer, adv. Sophie Giorgi, eers oor 25 jaar – op die ouderdom van 53 – vir parool in aanmerking kom.
Volgens die regter het die barbaarse manier waarop Ndaba die moorde gepleeg het die versagtende omstandighede in die saak oorheers. Ndaba het vroeër getuig dat die egpaar hom geld geskuld het. ‘n Medewerker het egter getuig dat Ndaba gesê het dat dit nie die geval was nie, en dat hy glad nie tevrede was met sy ontslag nie.
Die polisiebeamptes betrokke by die saak is vir hulle werk geloof.
Bron: Volksblad
26 November 2010
