Groot behoeftes bestaan tans aan telekommunikasiedienste in landelike gebiede.
Agri SA het derhalwe met Vodacom ’n ooreenkoms aangegaan rakende ’n verbeterde diens aan spesifiek landelike gemeenskappe. Die organisasie het ’n opdrag daaroor verlede jaar van sy kongres ontvang.
Luidens ’n verklaring hou die grootste probleme verband met die internet, e-pos en datadienste, maar meer onlangs is oproepe ook by die lys bygevoeg. Mnr. Chris Lazarus, besturende direkteur van Vodacom Sakedienste, sê die VSAT (Very Small Aperture Terminal)-produk wat aan landelike gemeenskappe beskikbaar gestel word, het unieke eienskappe ten opsigte van hoe die diens verskaf word.
“Die prosesse in die konfigurasie en die voorsiening van die produk is sover moontlik outomaties gemaak,” aldus Lazarus.
Plase
Lazarus sê op tien plase in die land word toetse gedoen om te bepaal of die diens net so doeltreffend in die uithoeke van die land is soos in die sentrale dele. Drie van dié plase is in die Noord-Kaap.
“Een van die plase waarop die toereikenheid van die stelsel bepaal word, is binne die SKA-gebied. Op plase wat tans geen of swak kommunikasie het, word gekyk of die stelsel ’n verbetering teweeg sal bring aan die gebiede se kommunikasiebehoeftes,” verduidelik Lazarus.
Lazarus sê die stelsel vir die VSAT-produk is landswyd beskikbaar deur bestaande verkoopskanale.
