Agri SA sê hy verwelkom die aankondiging van lt.genl. Khomotso Phahlane, waarnemende polisiekommissaris, dat die werwing van polisiereserviste in al nege provinsies kan voortgaan vir die 2016/’17 finansiële jaar.
“ ’n Goed funksionerende reservistestelsel sal bydra tot die polisie se bevordering van die “back to basics”-program en as magsaanvulling in landelike gebiede dien om verdere momentum te gee aan die implementering van die landelike beveiligingstrategie,” sê mnr. Kobus Breytenbach, voorsitter van Agri SA se landelike beveiligingskomitee.
Luidens ’n mediaverklaring van Agri SA sal reserviste “ter ondersteuning van misdaavoorkomingsoptredes op stasievlak en ter versterking van die polisie se vermoë gedurende hoë misdaadperiodes aangewend word”.
Diegene was belangstel om as reserviste aangestel te word sal aan streng vereistes moet voldoen en in die gemeenskap woon waar hulle aangewend word. Reserviste sal in twee afdelings gewerf word – vir gespesialiseerde operasionele ondersteuning en vir funksionele polisiëring.
“As ’n funksionele reservis sal hy of sy onder andere algemene polisiëringfunksies verrig soos diens in die gemeenskapsentrum, klagtes ondersoek en by huis en haard aktiwiteite betrokke raak. ’n Reservis in ’n gespesialiseerde beroep, soos ’n vlieënier of maatskaplike werker sal in sy of haar professionele hoedanigheid aangewend word. Dit sal van die reservis verwag word om 16 ure per maand vrywillige diens te verrig en om die voorgeskrewe opleiding te ondergaan, sê Agri SA.
“ ’n Beroep word op kwalifiserende lede van die boerderygemeenskap gedoen om die geleentheid aan te gryp en aansluiting as reservis te oorweeg en by die naaste polisiestasie daarvoor aansoek te doen,” sê Breytenbach.
