“Hoewel jy kan kies om politiek uit te los, beteken dit nie dat politiek jou gaan uitlos nie,” sê dr. Pieter Mulder, Adjunkminister van Landbou, Bosbou en Visserye.
Hy sê die bedryf moet homself voorberei daarop om in die spervuur te staan, veral met die komende ANC-beleidskonferensie in Junie vanjaar en verkiesings binne die regerende party in Desember.
Mulder het by die Anibrandfees in Uitenhage aan ‘n debat oor grondsake deelgeneem, en hy meen dat besluite oor grondhervorming nog langer kan neem as wat verwag word. “Ek hoop besliste besluite word nie geneem voor die verkiesing van die ANC se nasionale uitvoerende komitee in Desember nie – want dit kan Kabinetskommelings tot gevolg hê.”
Mulder sê hy stem saam dat die landboubedryf nie iets met politiek uit te waai het nie, “maar die bedryf moet besef hy gaan nie wegkom van politiek nie – veral met dié twee gebeurtenisse in gedagte.”
Nasionalisering van landbougrond
Wat uitsprake oor nasionalisering van mynwese en landbougrond betref, het pres. Jacob Zuma al in die binnekring en in sy staatsrede gesê dit is nie ‘n opsie nie. “Ek het die President gevra om dit wat hy in die binnekringe gedeel het, ook met die publiek te deel, maar ek dink nie hy het dit duidelik genoeg gestel nie,” aldus Mulder.
Volgens Mulder is dit baie belangrik dat die regte besluite oor nasionalisering en grondhervorming by die beleidskonferensie in Bloemfontein geneem moet word. “Die besluite wat vyf jaar gelede in Polokwane geneem is, het ons die afgelope vyf jaar onder geweldige druk geplaas, en dié konferensie se besluite sal ook druk veroorsaak.
“As nasionalisering enigsins oorweeg word, sal dit die landboubedryf se fondamente skud en alle sekerheid binne die bedryf wegneem.” Mulder twyfel of so ‘n roete gevolg sal word en meen dat enige besluite in dié verband langer vat om uit te voer as wat gesê word. Hy twyfel ook of ‘n besliste besluit oor die Groenskrif oor grondhervorming voor die einde van die jaar geneem sal word. “Dit sal egter beslis lewendig gehou word.”
30 April 2012
