Sowat 16% meer kanola kan vanjaar geproduseer word, terwyl die jongste oesskatting ‘n styging van 4% in die produksie van koring aandui.
In sy hersiene oppervlakte- en derde produksieskatting van wintergewasse, sê die Nasionale Oesskattingskomitee die verwagte produksie vir koring is 1,571 miljoen ton, of 4,05% minder as die vorige skatting van 1,637 miljoen ton. Die verwagte opbrengs is 2,81 t/ha.
Die verwagte produksie in die Wes-Kaap is 596 250 ton, wat 26 500 ton minder is as die vorige skatting. Die verwagte produksie in die Vrystaat is 428 400 ton, wat 40 800 ton laer is as die vorige skatting, en in die Noord-Kaap is die verwagte produksie 256 500 ton, dieselfde as die vorige skatting. Die afname in die verwagte produksie van koring kan hoofsaaklik toegeskryf word aan ongunstige weerstoestande in sommige provinsies.
Die oppervlakteskatting vir koring is onveranderd gelaat op 558 100 ha.
Ander gewasse: Die produksieskatting vir moutgars is 218 416 ton, wat 3,23% of 7 300 ton minder is as die vorige skatting van 225 716 ton. Die oppervlakte beplant is beraam op 82 670 ha, terwyl die verwagte opbrengs 2,64 t/ha beloop.
Dit het onder die aandag van die Oesskattingskomitee gekom dat daar ook kommersiële kanola-aanplantings in die Noord-Kaap (500 ha), die Vrystaat (212 ha) en in KwaZulu-Natal (112 ha) voorkom. Die verwagte kanola-oes is nou 39 650 ton, wat 16,62 % of 5 650 ton hoër is as die vorige skatting van 34 000 ton. Die oppervlakteskatting vir kanola is ook hersien na 34 820 ha, wat 2,40% meer is as die 34 000 ha teenoor die vorige skatting. Die verwagte opbrengs van kanola is 1,14 t/ha.
22 Oktober 2010
