Ondanks die laer mieliepryse en die groeiende verbruikersvraag na suiwelprodukte, was melkproduksie in Julie vanjaar 0,3% laer as in Julie 2013.
In die eerste sewe maande van 2014 was melkproduksie 0,5% laer as in die ooreenstemmende tydperk verlede jaar, sê dr. Koos Coetzee, hoofekonoom van die Melkprodusente-organisasie in sy jongste verslag oor markneigings in die bedryf.
Verhogings in produsentepryse sedert Januarie 2014 sal dalk eers in die lente tot hoër produksie lei, sê hy.
Die laer mieliepryse sal verligting vir produsente bring, maar die laer pryse word nog nie in die pryse van voer weerspieël nie. Terwyl produksie gedaal het, het die verbruikersvraag gegroei.
Nielsen-syfers wat die SA Melkverwerkersorganisasie (Sampro) voorsien het, kan gebruik word om neigings in die mark te eien.
Hiervolgens het die formele kleinhandelvraag na langlewemelk (UHT) in die twaalf maande tot Maart vanjaar met 7,9% gestyg. Die styging in die vraag na voorafverpakte kaas het met 23,4%, na botter met 15%, na jogurt met 2,2% en na gegeurde melk met 1,8% gestyg.
Die vraag na vars melk het wel met 4% gedaal soos wat verbruikers meer langlewe- as vars melk gekoop het.
Vir die kleinhandel om in verbruikersvraag te kon voorsien, moes meer produkte vanjaar ingevoer word. In die eerste ses maande is 21% meer suiwelprodukte ingevoer as in die ooreenstemmende tydperk verlede jaar. Dit is nadat invoer verlede jaar met 43% teenoor 2012 gedaal het.
Uitvoer het ook vanjaar gestyg, maar met 'n kleiner persentasie: In die eerste ses maande het uitvoer met 10% gestyg vergeleke met die ooreenstemmede tydperk in 2013.
