Die dieselprysstyging van 14c tot 15c per liter, wat om middernag op 1 Desember inskop, kom op ‘n baie slegte tyd, sê Graan SA.
Dr. Kobus Laubscher, hoof uitvoerende beampte van dié organisasie, sê sommige koringboere is, weens die reënseisoen, nog besig om te oes, terwyl ander saaiboere eers laat hulle landerye kon begin voorberei om te plant.
“Baie boere het weens die laat reën beplan om eers later te plant want daar is nog bietjie tyd om te plant, en dié styging sal vir hulle sleg wees,” sê Laubsher.
Invloed van R150 miljoen
Mnr. Johan Pienaar, adjunk-uitvoerende direkteur van Agri SA, sê dié styging kan die landbou oor ‘n jaartydperk ‘n ekstra R150 miljoen uit die sak jaag. Hy sê volgens berekeninge het elke sent se styging op ‘n jaarbasis ‘n invloed van R1 miljoen op dié sektor.
Pienaar meen egter dat ‘n stygende dieselprys nie tans die grootste kwessie in die landbou is nie. “Elektrisiteits- en waterkoste is tans ‘n groter probleem as die brandstofkoste.”
Effek op twee fronte
Intussen sê mnr. Ernst Janovsky, hoofbestuurder van Absa Agribesigheid, die styging gaan die bedryf op twee fronte sleg tref – “baie boere is nog in stroop- en planttyd, en ook op die logistieke gedeeltes van vervoer van produkte waarvoor die styging inherent tot hoër kostes kan lei.”
Hy meen dat die wisselkoers in die komende maande ‘n sleutelrol gaan speel in brandstofpryse en moontlike stygings. “Die vraag na veral diesel is tans hoër in Europa - wat glo weer ‘n baie koue winter beleef - wat na ‘n styging in dieselpryse kan lei. Die sterkte van die rand teenoor die dollar het die afgelope maande as ‘n buffer opgetree rakende hoë internasionale oliepryse, maar weens ekonomiese onstabiliteit in Europa, vertoon die wisselkoers tans swakker as vroeër,” sê hy.
Volgens die Sentrale Energiefonds styg die prys van petrol met 13c per liter.
1 Desember 2010
