Plaaslike en internasionale kopers het hul hande diep in die sakke op dié veiling gedruk om van die wêreld se beste Chianina-teelmateriaal in die hande te kry. Volgens De Jager was die diere op die veiling uitsonderlike teelmateriaal.
Sementrooitjies van die top-Italiaanse Chianinabul Lio di Maria Bianca is teen R16 000 elk verkoop. De Jager is die enigste teler in Italië en Suid-Afrika wat nog semen van Lio besit en hy het vyf strooitjies op die veiling aangebied. Mnre. WJ de Beer van Rustenburg het twee strooitjies gekoop, WH van Heerden van Roedtan ook twee en die ander strooitjie is deur 777 Wildlife van Menlopark opgeraap.
Boonop is drie embrio's van een van Lio se dogters, die Italiaanse kampioenkoei Sasha (wat aan O-La-La Chianinas in Italië behoort) teen 'n allemintige R50 000 stuk aan William C. Enterprices van North MacKay, Queensland (Australië), verkoop.
Lio (op foto) is in 2005 gekies om die Chianinaras op daardie jaar se wêreldkongres van Italiaanse beesrasse in Italië te verteenwoordig. De Jager het die foto op die kongres geneem. Die bul se ma het 'n tussenkalfperiode van minder as 350 dae oor 13 kalwers gehad. Lio het verskeie Italiaanse kampioene opgelewer, waaronder dogters soos Sasha, Ramona en Ubala. Altesame 42 van die top 50 vroulike diere op die Italiaanse indekslys vir vroulike diere in 2012 was sy dogters.
Sy seun Asso is die huidige topbul ingevolge Blupwaarde in Italië. Sy seun Urlo (uit die koeilyn van Diana en Nania) word as die beste teelbul in Italië beskou en sy seun Cé is die afgelope twee jaar se nasionale skoukampioenbul in Italië.
Die Chianina is 'n groot bees. Volwasse bulle trap die skaal soms verby 1,5 ton en groot koeie kan tot 1 200 kg weeg. Die ras se waarde is veral in kruisteling, want die speenkalwers weeg maklik tot 40 kg meer as rasegte kalwers en beskik oor n uitstekende voeromsetverhouding en groeikrag “Die ras word ook gekenmerk deur sy goeie uitslagpersentasie van tot 65 en uitstekende vleisgehalte,” sê De Jager.
Die duurste bul op die veiling is teen R200 000 aan mnr. Johan Fouché van Kyalami verkoop. Fouché het ook die duurste vers teen R100 000 saam met mnr. W. van Heerden van Roedtan gekoop.
Stoetbulle het gemiddeld R170 000 stuk behaal, kuddebulle gemiddeld R82 500 stuk, speenverse gemiddeld R35 555, dragtige verse gemiddeld R88000 stuk, koeie met kalwers gemiddeld R62 857, dragtige koeie gemiddeld R46 785 stuk en koeie wat by die bul geloop het, gemiddeld R32 500 stuk.
BKB Van Wyk het die veiling aangebied.
