Transnet wil oor die volgende sewe jaar R205 miljard in sy spoornetwerk belê. Dít is deel van dié semi-staatsinstelling se plan om tot 2019 R300 miljard in infrastruktuur te belê en sodoende tot 588 000 werkgeleenthede te skep.
Die oorblywende geld is meestal vir die uitbreiding van hawens en pyplyne geoormerk. Mnr. Brian Molefe, uitvoerende hoof van Transnet, sê spoorvervoer is gemiddeld 75% goedkoper as padvervoer.
“Die grootskaalse skuif vanaf pad na spoor sal nie net koste besnoei nie, maar ook opeenhopings verlig en die land se koolstofspoor verklein.” Indien die projek suksesvol is, sal dit Transnet se omset binne sewe jaar bykans verdriedubbel – van R46 miljard tot R128 miljard. Dit beteken dat die omset met 16% per jaar moet groei.
Finansiering
Me. Lindie Stroebel, senior ekonoom van die Landboubesigheidskamer (LBK), is bekommerd oor waar Transnet dié geld gaan bekom.
“Die Tesourie bestee te min belastinggeld op Spoornet en nou moet dié geld vanaf verbruikers ingevorder word.” Stroebel is egter dankbaar dat daar planne is om in vervoerinfrastruktuur te belê.
“Die vraag is net of dié planne deurgevoer gaan word en of dit werklik ’n verskil aan die land se toekoms gaan maak.” Stroebel sê daar was al telkemale soortgelyke beloftes aan die landbou gemaak, maar daardie beloftes het weinig opgelewer.
13 April 2012
