“Ons het al elke regeringsklip omgekeer om amptenare bewus te maak hoe krities die droogte in die Sarah Baartman munisipale distrik is sodat dit as rampdroogtegebied verklaar kan word, maar tot nou het daar absoluut niks van gekom nie.”
Só het ’n ontstelde mnr. Doug Stern, voorsitter van Agri Oos-Kaap, gesê toe hy die organisasie se jaarkongres op Port Alfred geopen het.
Volgens Stern het die departement van landelike ontwikkeling en grondhervorming in hulle voorlegging vir droogtehulp daarop gewys ’n groot hoeveelheid van die 5,4 miljoen stuks vee in die distrik gevaar staan om te vrek as daar nie hulp kom nie.
Rampdroogtegebied
’n Bedrag van R98,5 miljoen is vir voer en R29,5 miljoen vir watervoorsiening aangevra. “Indien die distrik as rampdroogtegebied verklaar word, sal dit boere in staat stel om minstens vir gesubsidieerde rentekoerse by die Land Bank aansoek te doen.”
Met verwysing na R1 miljard wat verlede jaar deur drie staatsdepartemente vir droogtehulp aan die landbousektor bewillig is maar slegs 5% hiervan boere bereik het, het Stern daarop aangedring dat die “korrupsie en bedrog” in die Regering se droogtehulp-program oopgevlek sal word.
“Vermoedelik het amptenare in die Departemente van Landbou, Bosbou en Visserye, asook Water en Sanitasie, by die skema baat gevind het. Wie het hierdie geld – wat die boere toekom- in hulle sak gesteek?” wou hy weet.
Goeie boodskap vir boere
Stern het nietemin ook ’n positiewe boodskap vir boere gehad. Landbouproduksie het die afgelope twee dekades danksy verbeterde tegnologie met 40% toegeneem. Waar boere in die Cradock-distrik in die 1980’s ’n opbrengs van 10t/mielies/ha behaal het, mik hulle nou na 30/t/ha.
Suid-Afrika is tans die Afrika-land met die grootste voedselsekerheid en die enigste netto uitvoerder van produkte op die vasteland. “Ons boere is loshande die leiers in landbou in Afrika en van die beste ter wêreld. Ondanks die onstabiliteit in die ANC en die onsekerheid wat dit ook vir die landbousektor meebring, sal ons voortaan ’n groter rol speel om ons eie toekoms te bepaal. Ons kan nie wag dat iemand anders dit vir ons doen nie.”
