Ramphulpgeld is ná verwoestende brande verlede maand in die Vrystaat toegeken, sê die provinsiale departement van landbou, bosbou en visserye.
Mnr. Malcolm Procter, adjunk-direkteur van bos- en veldbrandtoesig, sê die geld is aan die hele provinsie toegeken, maar onderverdeling daarvan aan omgewings wat die ergste geraak is, moet nog plaasvind. “Dit was die ergste brandseisoen wat die Vrystaat nóg ervaar het. Tot dusver weet ons van 402 357 ha wat afgebrand het,” vertel Procter.
Volgens Procter het vier keer meer weiding as wat gewoonlik per jaar afbrand, vanjaar in die Oos-Vrystaat se Thabo Mofutsanyane-munisipale distrik in die slag gebly. “Die Dihlabeng-munisipaliteit, wat Bethlehem, Clarens en Fouriesburg insluit, is die ergste geraak.”
Brandstigters gesoek
Procter sê hy vermoed brandstigters is verantwoordelik vir baie brande in die Rosendal, Clarens en Fouriesburg-distrikte. “Ons vermoed dit en ondersoek tans die moontlikhede, maar niemand is nog in hegtenis geneem nie.”
Boere van die Fouriesburg-distrik het, ná 65 000 ha verlede maand in die omgewing afgebrand het, twee sake van brandstigting by die plaaslike polisiestasie aangegee.
Lewensverlies
‘n Derde persoon het vandeesweek gesterf nadat hy ernstige beserings in ‘n brand opgedoen het. Procter sê dit is ‘n plaaswerker van die Luckhof-distrik. ‘n Plaaswerker van Heilbron, wat deur ‘n brand op ‘n trekker oorval is, asook ‘n 21-jarige boer van Bethlehem, is die ander twee slagoffers van vanjaar se brande.
Baie welkome reëns het intussen oor verskeie dele van die Vrystaat begin uitsak.
Absa Agri-fonds
Intussen het Absa AgriBesigheid ‘n ramphulpfonds van sy eie op die been gebring om boere landswyd, wat brandskade gely het, by te staan. Luidens ‘n berig op Timeslive sê mnr. Ernst Janovsky, bestuurder, 520 000 ha se weiding het die afgelope week in die land afgebrand.
Janovsky sê diegene met ekstra voer wat dit aan boere, wat geraak is wil skenk, kan met hul plaaslike landbou-organisasies skakel. “Die geldelike skenkings wat ontvang word, sal vir herverdeling aan Agri Limpopo, Agri Noordwes, Vrystaat Landbou, Agri Noord-Kaap, Agri Oos-Kaap en Agri KwaZulu-Natal gegee word.”
Die rekeningbesonderhede is: Absa AgriBesigheid Ramphulpfonds 2010. Dit is ‘n spaarrekening. Rekeningnommer: 92-5241-2925; Taknommer: 63-20-05.
Bron: Timeslive - http://www.timeslive.co.za/business/article706636.ece/ABSA-AgriBusiness-opens-disaster-fund
14 Oktober 2010
