Nege verdagtes, van hulle wat onder meer voormalige werknemers van Akwandze Agricultural Finance was, is verlede week op klagte van bedrog ter waarde van R28 miljoen en geldwassery in hegtenis geneem. RCL Foods, ‘n aandeelhouer van Akwandze Agricultural Finance, het meer inligting oor dié saak met Landbou.com gedeel.
Akwandze Agricultural Finance is ’n ontwikkelingsfinansieringsorganisasie wat sedert 2006 produksiekrediet verskaf aan suikerrietkwekers wat suikerriet aan RCL Foods lewer. Dit konsentreer op kleinskaalse kwekers en gemeenskapsgebaseerde gesamentlike ondernemings.
Akwandze is ’n gesamentlike onderneming tussen RCL Foods Sugar & Milling en Liguguletfu Cooperative Limited, wat 1 200 kleinskaalse boere in die Nkomazi-gebied van Mpumalanga verteenwoordig.
Akwandze is op die been gebring met die doel om transformasie in die suikerrietbedryf te steun deur ongesekureerde krediet teen ’n laer rentekoers te verskaf aan kwekers wat nie vir tradisionele finansiering in aanmerking kom nie. Sedertdien het Akwandze meer as R3 miljard in kleinskaalse kwekers en B-BBEE- gesamentlike ondernemings in die vorm van lenings en retensiespaargeld belê.
Akwandze is ’n onafhanklike regsentiteit met sy eie uitvoerende hoof, direksie en ouditkomitee. Die personeel bestaan uit ’n uitvoerende hoof, ’n finansiële bestuurder, twee leningsbestuurders (een vir grootskaalse kwekers en een vir kleinskaalse kwekers), ’n rekenmeester, ’n administratiewe assistent en twee klerke. Die uitvoerende hoof, mnr. David Thomson, is op 1 Julie 2020 aangestel.
So het die ondersoek verloop
RCL Foods het in September 2020 met ’n forensiese ondersoek begin nadat verdagte transaksies aan die lig gekom het. ’n Onafhanklike forensiese ondersoeker en ’n onafhanklike, eksterne geoktrooieerde rekenmeester het bevind dat bedrieglike betalings ter waarde van sowat R28 miljoen gemaak is weens sameswering tussen twee Akwandze-amptenare en vier verskaffers. Dié verlies is herwin ná ’n aparte ondersoek deur Akwandze se versekeraars.
Albei amptenare is onmiddellik geskors en dissiplinêr aangekla. Akwandze het ’n strafsaak in Desember 2020 by die Malalane-polisie geopen. Die saak is aan die Valke se ondersoekspan vir ernstige kommersiële misdaad in Nelspruit oorhandig.
“Die Akwandze-direksie en RCL Foods beskou hierdie oortreding in ’n uiters ernstige lig. ’n Aantal verbeteringe aan operasionele beheermaatreëls is sedertdien geïmplementeer om Akwandze se beheeromgewing te versterk om die risiko van bedrog vir Akwandze verder te beperk,” lui ’n verklaring deur RCL Foods.
Die beskuldigdes is op Woensdag 13 April by Malelane in hegtenis geneem en het gister (19 April) in die Tonga-landdroshof verskyn. Borgtog van R20 000 elk is aan hulle toegestaan en die verhoor is tot 13 Julie uitgestel.
Volgens me. Bonnie Nxumalo, polisiewoorvoerder, kan daar nie tans oor die drie ander verdagtes se verbintenis tot die saak uitgebrei word nie aangesien die ondersoek nog nie afgehandel is nie.
