Die mees onlangse slagoffer was die 76-jarige me. Susan Kotze van Lephalale in Limpopo, wat in haar plaashuis verwurg aangetref was. Drie van die vyf moorde het in Noordwes voorgekom terwyl daar een in Limpopo en een in KwaZulu-Natal was. Hierdie statistiek sluit aan by die 11 moorde op plase wat landswyd oor Desember voorgekom het.
Genl. Chris van Zyl, die TLU SA se assistent-hoofbestuurder, meen die polisie se landelike-veiligheidstrategie werp nie die verwagte vrugte af nie. “Dit is ’n omvattende, werkbare strategie en as alle amptenare daarby ingekoop het, dan moes ons mos al resultate gesien het. Maar die aantal plaasmoorde per jaar bly konstant terwyl die aantal boere aanhou afneem – dit maak net nie sin nie.
“Dit is opvallend dat sedert 2014 daar ’n sigbare aktivering in voorheen ‘stil’ gebiede was. Dit sluit die noorde van KwaZulu-Natal en die Suidkus in. My persoonlike opinie is dat daar doelbewus getrag word om geweldsmisdaad op plase geografies so te versprei, dat dit optimale impak oor ’n veel groter gebied kan maak. Hierdie tendens is nie alleen sigbaar in KwaZulu-Natal nie, maar ook in Mpumalanga, die Oos Kaap en Wes-Kaap,” verduidelik Van Zyl.
Mnr. Skippie de Klerk (30) is op sy plaas in die Rustenburg-omgewing op 3 Januarie vanjaar vermoor. Daarna is mnre. A. du Preez (76) en L. Snyman (67), ook van die Rustenburg-omgewing in twee aparte voorvalle op 4 Januarie vermoor. Mnr. Malcolm Green (69) van Estcourt is ook op 4 Januarie vermoor en daarna het die moord van me. Susan Kotze gevolg.
Mnr. Koos Marais, bestuurder van Kwanalu se sekuriteitskantoor, het sy misnoeë oor die moorde uitgespreek, maar het gemaan teen oorreaksie. “Onafhanklike instansies wat hierdie inligting insamel kan van onskatbare waarde wees vir die polisie en speel ’n enorme rol daarin om die platteland te help beveilig. Ons moet egter alles in ons vermoë doen om ons statistiek en intelligensie geloofwaardig en sonder enige betwyfeling te hou. Ons kan nie bekostig om van die polisie ook ’n vyand te maak nie.”
