Sosiale media het die laaste naweek in April gegons oor welkome reën by die droogtegeteisterde Calvinia en Williston, maar dis ongelukkig nie genoeg om die dreigende krisis af te weer nie.
Mnr. Wimpie Steenkamp, wat tussen Calvinia en Sutherland boer, sê hulle is baie dankbaar vir die reën, maar dit het “streep-streep” geval en meestal min verligting gebring. By ’n buurman wat sowat 50 mm reën gekry het, lyk die veld egter mooi.
Hy sê hulle voer nog eenstryk deur hul vee, maar mense het nie juis meer geld om voer te koop nie. Al ligpuntjie is dat hulle as gevolg van die daling in die mielieprys darem nou net R143 per 50 kg-sak mielies betaal in plaas van R220 per sak.
“Dis al vier jaar dat ons so taai trek. Twee van die vier jaar het ek die hele jaar net 50 mm reën gekry, en een van die jare 90 mm. In ’n normale jaar kry ons 130 mm reën. In ’n baie goeie jaar kry ons 150 mm tot 200 mm reën.”
Hulle kry somerreën, en hul reëntyd is eintlik nou verby. As dit genoeg reën in die winter, sal hy wel hawer en gars kan plant vir voer en weiding later in die jaar. Hy sê die meeste boere het reeds hul vee met ’n derde of meer verminder. Hy meen die droogte het ’n vreeslike nadelige uitwerking op die gebied wat eintlik ’n baie stabiele boerderygebied is, en as hulle nie dringend reën kry, daar groot probleme voorlê.
Winterreën ook wisselvallig
Dieselfde situasie geld die winterreëngebied van Namakwaland en die Boesmanland wat in die somer reën kry. Mnr. Danie Jacobs, voorsitter van Agri Namakwaland, sê die laaste goeie reën wat die Boesmanland gekry het, was in Januarie 2016, toe daar tussen 70 mm en 200 mm reën gemeet is. “Ongelukkig het ons nie opvolgreën gekry nie. Die boere kry swaar en almal het al vee verminder.”
Jacobs sê die boere in die kommunale gebiede van Namakwaland het reeds voer van die Regering gekry, maar nie die kommersiële boere wat tussen hulle boer nie. Mnr. Sybrand Venter, wat by by Carnarvon boer, sê ’n deel van daardie distrik het goed reën gehad. Op sy grond wat nié reën gekry het nie, is sy voerkoste R1 per skaap per dag.
Volgens hom lyk dit sleg lyk in die omgewing van Fraserburg, Williston en Brandvlei, en is daar boere by in van die gebiede wat probleme met water het. “By Vosburg, Copperton en ’n groot deel van Vanwyksvlei het dit lekker gereën.”
